Жорий йилнинг 21 февралида Сирдарё вилояти ИИБ Ёнғин хавфсизлиги бошқармаси бошлиғи ўринбосари Шерзод Абдуллажонов ҳамда бўлим бошлиғи Жаҳонгир Ропиев хизмат сафари билан Гулистон шаҳридан Сирдарё туманига кетаётган чоғида Мирзаобод туманининг Ойдин маҳалласидаги уйдан қуюқ тутун чиқаётганини кўриб, ёнғинни ўчириш учун ёрдамга ошиқди, деб хабар берди ЎзА.
Маълум бўлишича, ёнғин Обод кўчасидаги Қаҳрамон Абдураҳмоновга тегишли 43-уйда содир бўлган.
Ойдин маҳалла фуқаролар йиғини раиси Бахтиёр Собиров ўт ўчириш гуруҳига хабар берилганини айтган.
Ёнғин 43-уй билан бир том остидаги 42-уйга ҳам ўтиб улгурган. Шу пайт у ердан ёрдам сўраб бақирган овоз эшитилган. Майор Шерзод Абдуллажонов ва подполковник Жаҳонгир Ропиевлар кучли олов ва нафас олишга имкон бермаётган қуюқ тутунга қарамай, ўт ўчириш жанговар гуруҳини ҳам кутмасдан, эшикни бузиб ичкарига кирган.
Ёнғин хавфсизлиги ходимларининг тезкор ҳаракатлари натижасида Обод кўчаси 42-уйда яшовчи, 1957 йилда туғилган Усмон Хўжақулов, унинг турмуш ўртоғи ҳамда келинининг ҳаёти сақлаб қолинган.
Изоҳ (0)