26 февраль куни Ўзбекистон бўйлаб ёғингарчилик кузатилди. Бу ҳудудларда баъзи ноқулайликларга сабаб бўлди. Хусусан, Жиззах вилояти Дўстлик шаҳрининг айрим кўчалари юриш учун яроқсиз аҳволга келиб қолган.
«Ҳар ёмғирдан кейин биз пиёдалар учун мураккаб жараён юз беради — йўлда юриш ноқулайлашади. Бу жараён сизга ҳам танишми?», — деб ёзган «Халқ билан мулоқот» гуруҳида Дўстликдаги вазият суратларини эълон қилган фойдаланувчи.
Дўстликдаги вазият билан яқиндан таниш блогер Санжар Саиднинг таъкидлашича, бу жойларни «шаҳар дейишга тил ҳам бормайди».
«Нечта ҳоким келса ҳам, вазият ўзгармайди. Улар иш вақтида, иш жойида нима билан машғул, ҳайронман. Ўтган йили ички йўлларни яхшилаш дастури доирасида 7 километр йўл таъмирланиши керак эди, лекин ўзгариш сезилмади. Қачон биз ҳам рисоладагидек йўллардан юрамиз? Аҳволимизга маймунлар йиғлаб ўтирибди-ку!», — деб ёзади блогер.
Қайд этиш жоиз, фотохабар остида муҳокамага киришган фойдаланувчилар орасида «шу ерда яшаётган одамларнинг ўзи пул йиғиб, йўлни тузатиб олса бўлади-ку, қачон ҳокимлик қилади, деб ўтирмасдан» қабилида фикр билдирганлар ҳам бор.
Изоҳ (0)