Ўзбекистоннинг яна уч халқаро аэропорти — Андижон, Нукус ва Навоийда «очиқ осмон» тартиби жорий этилади. Бу ҳақда Ўзбекистон Президенти Шавкат Мирзиёев раислигида 22 февраль куни бўлиб ўтган видеоселектор йиғилишида маълум қилинди, дея хабар беради «Газета.uz».
Йиғилишда «Ўзбекистон ҳаво йўллари» миллий авиакомпаниясининг авиачипталар нархини мақбуллаштириш, янги рейслар очиш, парвозлар йўналиши ва йўловчиларни транзит ташиш имкониятини кенгайтириш борасидаги сусткашлиги танқид остига олинди.
«Шу сабабли минглаб ўзбекистонликлар хорижга парвозларни қўшни давлатлар орқали амалга оширишга мажбур бўлмоқда», деди давлат раҳбари.
Авиакомпанияга маркетинг ва авиачипталар сотишнинг замонавий механизмлари, дунёнинг кўплаб мамлакатларида фойдаланиладиган йўловчиларга хизмат кўрсатиш тизимини жорий этиш топширилди.
Эслатиб ўтамиз, Президентнинг февраль ойида қабул қилинган «Кириш туризмини ривожлантириш чора-тадбирлари тўғрисида»ги қарорида «Қарши» аэропортини «Ўзбекистон ҳаво йўллари» МАК таркибидан чиқариш кўзда тутилганди.
Изоҳ (0)