Ҳиндистоннинг кимё саноати ва ўғитлар давлат вазири Мансуҳ Мандавия бошчилигидаги делегациянинг мамлакатга ташрифи доирасида Ўзбекистон ва Ҳиндистон ишбилармон доираларининг бизнес-анжумани бўлиб ўтди. Бу ҳақда ЎзА хабар берди.
Ўзбекистон Савдо-саноат палатаси ва Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги ҳамкорлигида ташкил этилган тадбирда икки мамлакатнинг фармацевтика ва кимё саноати соҳасида фаолият юритаётган компания ва концернлари раҳбарлари иштирок этди.
Форум доирасида меҳмонларга Ўзбекистонда ишлаб чиқаришни эркинлаштириш, фармацевтика саноатини янада ривожлантириш, эркин ва кичик саноат зоналари, уларда инвесторлар учун яратилган солиқ имтиёзлари ва бошқа қулайликлар ҳақида маълумот берилди. Ҳиндистон фармацевтика ва кимё саноати компаниялари вакиллари мамлакатнинг шу соҳадаги салоҳияти билан ҳам атрофлича таништирилди.
«Ўзбекистон – Ҳиндистон ҳамкорлигида фармацевтика тармоғи алоҳида ўрин тутади. Ушбу ташрифдан мақсад фармацевтика саноатини янада ривожлантириш соҳасидаги ҳамкорликни кенгайтириш, биргаликдаги илмий-тадқиқот ишларини ташкил этишдан иборат. Бизнес-форум келажакдаги ҳамкорлик йўналишларини белгилаб олиш имконини бергани билан муҳим аҳамиятга эга», — деди М. Мандавия.
Анжуманда фармацевтика ва кимё саноати соҳасидаги алоқаларни фаоллаштириш, шу орқали савдо-иқтисодий ва сармоявий ҳамкорликни ривожлантириш, Ҳиндистон компанияларини мамлакатдаги хусусийлаштириш жараёнига кенг жалб этиш каби масалалар муҳокама қилинди.
Изоҳ (0)