Қирғизистоннинг Жалолобод вилояти Қўчқор-Ота шаҳридаги қаҳвахонада юз берган портлашда жабрланган уч нафар ўзбекистонлик мамлакатга келтирилди. Бу ҳақда «Дарё»га Наманган вилоят ФВБ ахборот-таҳлил хизмати маълум қилди.
Қўчқор-Ота шаҳридаги шифохонага жойлаштирилган, Наманган шаҳрида 1995 йилда туғилган Аъзамжон Валиев ва 1994 йилда туғилган Муҳаммадбобур Турғунпўлатов Андижон вилояти, Пахтаобод туманидаги «Маданият» божхона пости орқали олиб ўтилиб, махсус тез тиббий ёрдам машиналарида Республика шошилинч тез тиббий ёрдам илмий маркази Наманган филиалига олиб келинди. Ҳозирда филиалнинг жарроҳлик-жонлантириш бўлимига ётқизилган беморларнинг аҳволи қониқарли.
Шунингдек, Ўш вилоят касалхонасининг жонлантириш бўлимига ётқизилган, 1994 йилда Наманган шаҳрида туғилган Рустам Парпиев Андижон вилоятининг Хўжаобод туманидаги «Дўстлик» божхона комплекси орқали олиб ўтилиб, ҳолати оғирлигини инобатга олган ҳолда Республика шошилинч тез тиббий ёрдам илмий маркази Андижон филиалининг жонлантириш бўлимига ётқизилди.
Изоҳ (0)