Халқаро пресс-клубнинг навбатдаги сессиясида «Ўзстандарт» агентлиги бош директори А. Каримов ва соҳа масъуллари ислоҳотларнинг янги босқичида тизимда амалга оширилаётган чора-тадбирлар ҳақида сўзлади. Бу ҳақда ЎзА хабар берди.
Таъкидландики, Президент қарори билан келтирилаётган ва ишлаб чиқарилаётган маҳсулотларнинг мувофиқлик сертификатини расмийлаштириш муддати 3 иш кунигача қисқартирилди. Шунингдек, маҳсулотларни сертификатлаштиришдан уларни декларациялаш йўли орқали мувофиқлигини баҳолаш тизимига ўтилмоқда.
Мутахассислар маълумотига кўра, 2017 йилдаги сертификатлаштириш жараёнида 141 миллиард 547 миллион сўмлик маҳсулот яроқсиз деб топилган. Уларнинг асосий қисмини импорт маҳсулотлари ташкил этган ва ички бозорга киритилишининг олди олинган.
Ўтган йили сертификатлаштириш идоралари томонидан ўтказилган инспекция назорати чоғида ишлаб чиқаришга расмийлаштирилган 1815 мувофиқлик сертификатида камчиликлар аниқланиб, уларнинг амал қилиш муддати вақтинчалик тўхтатилган.
Жорий йилда агентлик томонидан «Ҳалол» стандарти қабул қилинди. Айтиш жоизки, «Ҳалол» стандарти Ўзбекистон Республикаси қонун ҳужжатларига мувофиқ миллий аккредитациядан ўтказилган сертификатлаштириш идоралари томонидан қўлланилади.
Агентлик Тошкент шаҳри бозорларида сотилаётган болалар ўйинчоқларини текширди. Натижада 5 турдаги болалар ўйинчоқлари ташқи кўриниши ва хавфсизлик кўрсаткичлари бўйича меъёрий талабларга номувофиқ деб топилди.
Изоҳ (0)