Тошкент шаҳрида фаолият юритувчи адвокатлик тузилмалари томонидан ҳафтанинг маълум кунида фуқароларга ҳуқуқий ёрдам кўрсатиш бўйича «Очиқ эшиклар куни» ўтказилади. Бу ҳақда ЎзА хабар берди.
Ана шундай «Очиқ эшиклар куни» пойтахтдаги «Ҳимоя манбаи» адвокатлик ҳайъатида бўлди. Аҳолига буни билдириш мақсадида ижтимоий тармоқларда хабарлар жойлаштирилиб, бинога «Ҳар пайшанба куни соат 9 дан 18 гача фуқароларга бепул ҳуқуқий маслаҳат берилади» деган эълон илинди.
«Очиқ эшиклар куни»да фуқаролар турли соҳалар бўйича, айниқса, уй-жой, ер ажратиш, мерос билан боғлиқ бўлган масалаларни ҳал этиш юзасидан мурожаат қилди.
— Адвокатлар палатаси томонидан ташкил этилган «Очиқ эшиклар куни»дан кўзланган асосий мақсад жисмоний ва юридик шахсларга бепул ҳуқуқий ёрдам кўрсатиб, улар дуч келаётган муаммолар юзасидан тушунтириш бериб боришдан иборат, – деди «Ҳимоя манбаи» адвокатлар ҳайъати раҳбари Шаҳзод Шарипов. — Бу лойиҳа асосида аҳолига сифатли, тезкор юридик ва адвокатлик хизмати кўрсатиш таъминланади. Фуқаролар нафақат адвокатдан ҳуқуқий маслаҳат олиши, балки суд ишини кўриб чиқиш бўйича адвокатлар билан шартномалар тузиши ҳам мумкин. Маҳалла раислари аҳолининг кам таъминланган қатламлари орасида адвокатларга эҳтиёжи борларни йиғиб, бизга мурожаат қилса, албатта, адвокатлар бориб маҳалланинг ўзида хизмат кўрсатади.
Изоҳ (0)