19 февраль куни ташқи савдо вазирлигида Афғонистон Президентининг МДҲ мамлакатлари билан ҳамкорлик қилиш учун махсус вакили Шокир Корган бошчилигидаги делегация билан учрашув ўтказилди. Бу ҳақда вазирлик матбуот хизмати хабар бермоқда.
Учрашувда Афғонистон президенти Муҳаммад Ашраф Ғанининг 2017 йил 4—6 декабрь кунлари Ўзбекистонга ташрифи давомида эришилган келишувларнинг амалий бажарилиши муҳокама қилинди.
Афғон бозорига маиший техника, трансформаторлар, кабел ва сим маҳсулотлари, трикотаж маҳсулотлари, маҳаллий енгил ва юк машиналари, автобуслар асосида қишлоқ хўжалиги ва махсус техникани мунтазам равишда етказиб бериш орқали ўзаро савдони диверсификация қилиш имкониятларига алоҳида эътибор берилди.
«Афғон вакиллари томонидан Ўзбекистондан Афғонистонга электр энергия, дори воситалари, кабел ва сим маҳсулотлари, шунингдек, Ўзбекистонда ишлаб чиқарилаётган қишлоқ хўжалиги техникаси ва автомобилларига катта қизиқиш билдирилди. Шунингдек, томонлар ўзбек автомобилларининг рақобатбардошлигини ошириш учун дилерлик ва хизмат кўрсатиш марказларини очиш имкониятларини кўриб чиқди», — дейилади хабарда.
Икки томонлама савдо-сотиқ ҳажмини янада кўпайтириш мақсадида томонлар Ўзбекистонда Афғонистон савдо офиси ташкил этилиши, «Термиз Карго» экспорт маркази фаолиятини фаоллаштириш, ҳамда Қобул ва Мозори-Шариф шаҳарларида ўзбек-афғон савдо уйларининг ишга туширилиши тўғрисида келишувларга эришди.
Изоҳ (0)