2016 йилнинг ноябрида Британиянинг Шарқий Йоркшир графлигида жойлашган Халл шаҳрида яшовчи 62 ёшли Жекки Диббга шифокорлар манглай-чакка деменсия (тафаккур бузилиши) ташхисини қўйган. Шифокорлар аёлга яна 5—7 йилгина умри қолганини маълум қилган, деб хабар берди TJournal.
Ташхисдан хабар топган Жекки ва унинг турмуш ўртоғи Роб «қолган умрдан унумли фойдаланиш»га қарор қилиб, йиғиб қўйган маблағларини ишлатишга киришиб кетган. Улар 700 фунтга икки эшикли музлатгич сотиб олган, 1,5 минг фунт эвазига Туркияга оилавий саёҳат уюштирган ва 4 минг фунтга ванна қурган.
Жеки ҳатто айрим қариндошлари билан видолашишга ҳам улгурган. Роб эса аёлига қараш учун ишидан бўшаган.
Орадан 345 кун ўтгач Дибб қайтадан текширувдан ўтганида унда ҳеч қандай касаллик йўқлиги аниқланган. Унинг дастлабки шифокори нотўғри ташхис қўйган. Шундан сўнг аёл Соғлиқни сақлаш тизимининг маҳаллий ваколатхонасига шикоят ёзган. Диббга келган жавобга кўра, депрессия сабабли симптомларда чалкашлик юзага келган.
Робнинг сўзларига кўра, шифокорлар нима сабабдан бундай хатоликка йўл қўйганликларини тушунтириб бермаган. Дибб тиббиёт ходимлари билан судлашишдан бош тортди, чунки суд иши шундоқ ҳам қийин аҳволда қолган оила учун 25 минг фунтга тушар ва 4 йил давом этган бўларди.
Изоҳ (0)