«Тошкент — Андижон (Ўзбекистон) — Ўш — Иркештом (Қирғизистон) — Кошғар (Хитой)» янги транспорт коридори бўйлаб биринчи колонна жорий йилнинг 25 февралида йўлга отланади. Бу ҳақда Ташқи савдо вазирлигига таяниб, «Газета.uz» хабар берди.
Ўзбекистон ва қўшни мамлакатлар экспортчиларининг маҳсулотлари 5 февраль куни ташкил этилган Силк Роад International қўшма корхонасининг автотранспорт воситалари орқали манзилига етказилади. Кошғарга етиб борган колонна ортга импорт маҳсулотларини олиб қайтади.
Ўтган йилнинг 30 октябридан 3 ноябрига қадар Ўзбекистон, Қирғизистон ва Хитой юк автомобиллари иштирокида синов маршрути амалга оширилган эди. 920 километр бўлган умумий масофа 31 соатда босиб ўтилган бўлиб, унинг 16 соатида автокалонна доим ҳаракатда бўлган.
Автоколоннанинг ўртача тезлиги соатига 50—60 километрни ташкил этган. Ўзбек-қирғиз чегарасини кесиб ўтишга («Дўстлик» пости орқали) 1,5 соат сарфланган бўлса, қирғиз-хитой чегараси («Иркештом») 2 соатда кесиб ўтилган.
Жорий йил охирига қадар мазкур коридор орқали 100 минг тоннага яқин экспорт-импорт юкларини олиб ўтиш режа қилинган. Ҳозирдаёқ уч ой олдинга 27 минг тонна ҳажмли юкни ташиш бўйича буюртмалар қабул қилинган.
«Янги маршрутга катта қизиқиш билдирилаётганининг асосий сабаби юкларни етказиб беришга кетадиган минимал вақт. Авваллари амалдаги коридор орқали юклар Ўзбекистондан Хитойга 8—10 кун ичига олиб борилган бўлса, янги маршрут орқали 2 кунда етказилмоқда. Керак бўлса, зарур юкларни бир суткада ҳам етказиш мумкин», — дейди ташқи савдо вазирининг ўринбосари Соҳиб Саифназаров.
Контейнер ва йиғма юкларни ташишдаги тарифлар тизимининг шаффофлиги ва мосланувчанлиги ҳар бир партия юкни етказиб бериш орқали 300—500 доллар тежаш имконини беради, бу эса йилига 2,5 миллион доллар демакдир.
Андижон вилоятида юк жўнатувчи ва қабул қилувчилар учун «Ахтачи» станциясида мультимодал транспорт-логистика маркази қурилди, бу эса республиканинг барча вилоятларидан темир йўл орқали Андижонга, кейин эса Хитойга юкларни олиб ўтиш имконини беради.
«Ўзбекистон—Қирғизистон—Хитой» янги темир йўлининг қурилишини фаоллаштириш натижасида мавжуд бўлган коридорлардаги масофани қарийб 1000 километрга қисқартириш имконини беради.
Мозори Шарифдан Андижонга ва у орқали Хитойга юкларни темирйўл орқали етказишга Афғонистон ҳам қизиқиш билдирмоқда. Янги «Мозори Шариф—Ҳирот» темирйўлининг қурилиши «Хитой—Марказий Осиё—Жанубий Осиё—Яқин Шарқ» қитъалараро транспорт коридорининг шаклланишини якунлаб беради.
Изоҳ (0)