“Toshkent — Andijon (O‘zbekiston) — O‘sh — Irkeshtom (Qirg‘iziston) — Koshg‘ar (Xitoy)” yangi transport koridori bo‘ylab birinchi kolonna joriy yilning 25-fevralida yo‘lga otlanadi. Bu haqda Tashqi savdo vazirligiga tayanib, “Gazeta.uz” xabar berdi.
O‘zbekiston va qo‘shni mamlakatlar eksportchilarining mahsulotlari 5-fevral kuni tashkil etilgan Silk Road International qo‘shma korxonasining avtotransport vositalari orqali manziliga yetkaziladi. Koshg‘arga yetib borgan kolonna ortga import mahsulotlarini olib qaytadi.
O‘tgan yilning 30-oktabridan 3-noyabriga qadar O‘zbekiston, Qirg‘iziston va Xitoy yuk avtomobillari ishtirokida sinov marshruti amalga oshirilgan edi. 920 kilometr bo‘lgan umumiy masofa 31 soatda bosib o‘tilgan bo‘lib, uning 16 soatida avtokalonna doim harakatda bo‘lgan.
Avtokolonnaning o‘rtacha tezligi soatiga 50—60 kilometrni tashkil etgan. O‘zbek-qirg‘iz chegarasini kesib o‘tishga (“Do‘stlik” posti orqali) 1,5 soat sarflangan bo‘lsa, qirg‘iz-xitoy chegarasi (“Irkeshtom”) 2 soatda kesib o‘tilgan.
Joriy yil oxiriga qadar mazkur koridor orqali 100 ming tonnaga yaqin eksport-import yuklarini olib o‘tish reja qilingan. Hozirdayoq uch oy oldinga 27 ming tonna hajmli yukni tashish bo‘yicha buyurtmalar qabul qilingan.
“Yangi marshrutga katta qiziqish bildirilayotganining asosiy sababi yuklarni yetkazib berishga ketadigan minimal vaqt. Avvallari amaldagi koridor orqali yuklar O‘zbekistondan Xitoyga 8—10 kun ichiga olib borilgan bo‘lsa, yangi marshrut orqali 2 kunda yetkazilmoqda. Kerak bo‘lsa, zarur yuklarni bir sutkada ham yetkazish mumkin”, — deydi tashqi savdo vazirining o‘rinbosari Sohib Saifnazarov.
Konteyner va yig‘ma yuklarni tashishdagi tariflar tizimining shaffofligi va moslanuvchanligi har bir partiya yukni yetkazib berish orqali 300—500 dollar tejash imkonini beradi, bu esa yiliga 2,5 million dollar demakdir.
Andijon viloyatida yuk jo‘natuvchi va qabul qiluvchilar uchun “Axtachi” stantsiyasida multimodal transport-logistika markazi qurildi, bu esa respublikaning barcha viloyatlaridan temir yo‘l orqali Andijonga, keyin esa Xitoyga yuklarni olib o‘tish imkonini beradi.
“O‘zbekiston—Qirg‘iziston—Xitoy” yangi temir yo‘lining qurilishini faollashtirish natijasida mavjud bo‘lgan koridorlardagi masofani qariyb 1000 kilometrga qisqartirish imkonini beradi.
Mozori Sharifdan Andijonga va u orqali Xitoyga yuklarni temiryo‘l orqali yetkazishga Afg‘oniston ham qiziqish bildirmoqda. Yangi “Mozori Sharif—Hirot” temiryo‘lining qurilishi “Xitoy—Markaziy Osiyo—Janubiy Osiyo—Yaqin Sharq” qit’alararo transport koridorining shakllanishini yakunlab beradi.
Izoh (0)