Ўзбекистон Президенти Шавкат Мирзиёев 13 февраль куни «Тошкент шаҳрида жамоат тартибини сақлаш, ҳуқуқбузарликлар профилактикаси ва жиноятчиликка қарши курашишнинг сифат жиҳатидан янги тизимини жорий этиш тўғрисида»ги қарорни имзолади.
«Ахборот 24» дастурининг 15 февралдаги сонида қайд этилишича, Президентнинг бу қарори билан нафақат ички ишлар органларининг тизими, таркибий тузилиши ўзгаради, балки соҳага замонавий ахборот технологиялари ҳам кенг жорий этилади.
Хусусан, Тошкент шаҳридаги ички ишлар бўлимлари ходимларини, биринчи навбатда, профилактика инспекторлари ва тезкор вакилларини мақсадли дастурий таъминот ўрнатилган ва ички ишлар органлари электрон ахборот тизимларининг маълумотлар базаларига уланган хизмат уяли телефонлари (планшетлар) билан босқичма-босқич таъминлаш ҳақида кўрсатма берилган.
«Ахборот 24»да ички ишлар органлари фаолияти учун замонавий ахборот-коммуникация технологиялари билан махсус жиҳозланган Damas автомобили намойиш этилди.
Ушбу тезкор автомобиль монитор, ноутбук, жойстик-контроллер билан жиҳозланган, томига махсус кузатув камераси ва қуёшдан қувват олиб, 12 соат давомида электр энергияси билан таъминлайдиган қуёш батареялари ўрнатилган.Автомобильдан жойлардаги тадбирларда, назорат пунктларида кириб-чиқаётган фуқароларни текширишда фойдаланилади. Шунингдек, йўлларда, маҳаллаларда юрганда машиналарнинг қарздорликлари бор-йўқлигини аниқласа бўлади. Компьютер орқали барча маълумотларни олиш мумкин.
Дониёр Ғаниев, Тошкент ИИББ техник мутахассиси
Изоҳ (0)