Жиноят ишлари бўйича Қорақалпоғистон Республикаси Хўжайли тумани судида фуқаро Маман Мунажовга нисбатан қўйилган озодликдан маҳрум қилиш жазоси бошқа жазо турига алмаштирилиб, у суд залидан озод этилди, деб хабар берди ЎзА.
Ўзбекистон Республикаси Олий суди ва Ўзбекистон Ёшлар иттифоқи марказий кенгаши томонидан имзоланган меморандумга мувофиқ, кафолат хати асосида озодликка чиққан Маман Мунажов 1989 йилда туғилган. Нукус шаҳридаги Жуўазши маҳалла фуқаролар йиғини Жузим бағ кўчасида яшайди.
У Нукус шаҳар ички ишлар бўлимининг катта инспектори лавозимида ишлаган даврида таъмагирликда гумонланиб, қўлга олинган. Ўзбекистон Республикаси Жиноят кодексининг 210-моддаси 2-банди билан судланган Маман Мунажов суд залидан озод этилди.
«Юқорида зикр этилган меморандум 2017 йил 5 декабрь куни Тошкент шаҳрида Ўзбекистон Республикаси Олий суди ва Ўзбекистон Ёшлар иттифоқи марказий кенгаши томонидан имзоланган. Меморандумнинг асосий мақсади ёшларнинг комил инсон бўлиб вояга етиши, жамиятда ўз ўрнини топиши, юртимиз тараққиётига ҳисса қўшишини таъминлашга шароит яратишдан иборат. Шунингдек, меморандумда билиб-билмай жиноят кўчасига кириб қолган ёшларни кафолатга олиш орқали озодликдан маҳрум қилиш билан боғлиқ бўлмаган жазо тайинлаш ёки суд залидан озод қилиш бош мақсадлардан бири ҳисобланади», — дейди Ўзбекистон Ёшлар иттифоқи Қорақалпоғистон Республикаси кенгаши ҳуқуқшунос-маслаҳатчиси К.Палуаниязов.
Меморандум талабларининг бири бўлган кафолат хати бериш – фақат жиноий иши судда кўрилаётган ёшларга берилиши назарда тутилган. Озодликдан маҳрум қилиш жазоси тайинланган, жазони ўташ муассасаларида жазо ўтаётган ёшларга кафолат хати бериш меморандум талабларига киритилмаган.
Изоҳ (0)