Жорий йилнинг 19 март куни Бухорода Италия ипак ассоциацияси билан ҳамкорликда халқаро анжуман ўтказилади. Унда Италия ипак ассоциацияси раҳбари Стефанo Витали раҳбарлигида кўплаб тадбиркор, инвесторларлар, молиявий институтлар,OPEC, UNIDO, FAO вакиллари ҳам қатнашиши кутилмоқда. Бу ҳақда «Ўзбекипаксаноат» уюшмасига таяниб, ЎзА хабар берди.
Саноат паркини ташкил этиш жараёнида «Ўзбекипаксаноат» уюшмаси БМТнинг бир қатор ташкилотлари билан ҳамкорликда Ўзбекистонда тажриба лойиҳаларини амалга оширишни режалаштирмоқда. Улар келгусида Туркманистон, Тожикистон каби қўшни давлатларга ҳам тадбиқ этилади.
Ҳозирга қадар соҳада Хитой, Вьетнам каби қирқдан ортиқ давлат вакиллари билан ҳамкорликда қўшма корхоналар ташкил этилган. Энди Италия, Франция, Германия каби давлатлар билан ҳамкорлик босқичи бошланади.
Шавкат Мирзиёев қишлоқ хўжалиги ходимлари куни муносабати билан бўлиб ўтган байрам тадбирида Ўзбекистон шароитида пиллачилик тармоғида 500 миллион доллар миқдорида экспорт қилиш имконияти борлиги ҳақида тўхталиб ўтган эди.
Эслатиб ўтамиз, ўтган йилнинг декабрь ойида Австрия пойтахти Вена шаҳрида ўтказилган «Ўзбек-Европа Ипак» форумида Стефано Витали Италия—Ўзбекистон ўртасидаги иқтисодий муносабатлар ушбу соҳада ҳам ривожланиши учун товар рекламасининг роли беқиёс эканини алоҳида таъкидлаганди.
Изоҳ (0)