Joriy yilning 19-mart kuni Buxoroda Italiya ipak assotsiatsiyasi bilan hamkorlikda xalqaro anjuman o‘tkaziladi. Unda Italiya ipak assotsiatsiyasi rahbari Stefano Vitali rahbarligida ko‘plab tadbirkor, investorlarlar, moliyaviy institutlar, OPEC, UNIDO, FAO vakillari ham qatnashishi kutilmoqda. Bu haqda “O‘zbekipaksanoat” uyushmasiga tayanib, O‘zA xabar berdi.
Sanoat parkini tashkil etish jarayonida “O‘zbekipaksanoat” uyushmasi BMTning bir qator tashkilotlari bilan hamkorlikda O‘zbekistonda tajriba loyihalarini amalga oshirishni rejalashtirmoqda. Ular kelgusida Turkmaniston, Tojikiston kabi qo‘shni davlatlarga ham tadbiq etiladi.
Hozirga qadar sohada Xitoy, Vyetnam kabi qirqdan ortiq davlat vakillari bilan hamkorlikda qo‘shma korxonalar tashkil etilgan. Endi Italiya, Fransiya, Germaniya kabi davlatlar bilan hamkorlik bosqichi boshlanadi.
Shavkat Mirziyoyev qishloq xo‘jaligi xodimlari kuni munosabati bilan bo‘lib o‘tgan bayram tadbirida O‘zbekiston sharoitida pillachilik tarmog‘ida 500 million dollar miqdorida eksport qilish imkoniyati borligi haqida to‘xtalib o‘tgan edi.
Eslatib o‘tamiz, o‘tgan yilning dekabr oyida Avstriya poytaxti Vena shahrida o‘tkazilgan “O‘zbek-Yevropa Ipak” forumida Stefano Vitali Italiya—O‘zbekiston o‘rtasidagi iqtisodiy munosabatlar ushbu sohada ham rivojlanishi uchun tovar reklamasining roli beqiyos ekanini alohida ta’kidlagandi.
Izoh (0)