5 февраль куни соат 23:00 ларда Юнусобод туманида номаълум ҳайдовчи автомашинани бошқариб кетаётиб, пиёдани уриб юборди. Бу ҳақда Тошкент шаҳар ИИББ матбуот хизмати маълум қилди.
Мазкур йўл-транспорт ҳодисаси натижасида 1991 йилда туғилган эркак «бош мия ёпиқ жароҳати ва чайқалиши, бурун суягининг синиб силжиши» ташхиси билан 7-шаҳар клиник шифохонасига олиб борилди. Ҳайдовчи пиёдага тиббий ёрдам кўрсатмай ва ички ишлар органларига хабар бермай ЙТҲ жойидан яширинган.
Шу куннинг ўзида Тошкент шаҳар ЙҲХБ ходимлари томонидан олиб борилган қидирув тадбирлари натижасида мазкур ЙТҲни содир этган ҳайдовчи 1980 йилда туғилган Зоир Султонов эканлиги ва у ўзининг бошқарувидаги Matiz Best русумли машинасида бўлганлиги аниқланди.
Ҳолат юзасидан З. Султоновга нисбатан тегишли ҳужжатлар расмийлаштирилиб, унинг автомобили жарима майдончасига тортилди.
Изоҳ (0)