Молия вазирлигида ўрта муддатли бюджет тузиш концепцияси ҳамда Наманган шаҳри мисолида бюджетни ўрта муддатга тузиш услубий қўлланмаси тақдимоти бўлиб ўтди. Бу ҳақда ЎзА хабар бермоқда.
Ўзбекистонда амалдаги тартибларга мувофиқ, давлат бюджети индексацияларни қўллаш методи билан бир йиллик асосда тузилади. Чунки бюджет маблағларини тақсимловчилар ва бюджет ташкилотлари ўзларининг истиқболларини режалаштирилган йилдан узоқроқ даврга прогнозлаштира олмайди. Бунинг асосий сабаби эса келажакдаги макроиқтисодий ўзгаришларни ва уларнинг фискал кўрсаткичларга таъсирини олдиндан кўра билиш имконияти йўқлигидир.
Ўрта муддатга бюджетни режалаштириш давлат бюджетини бир неча йилга (қоида тариқасида 3-5 йилга) тузиш жараёнидир. Ривожланган хориж мамлакатларида ушбу тизим шакллантирилган. Мамлакатда ҳам ушбу тизимни жорий этиш бўйича тизимли ишлар амалга оширилмоқда ва дастлабки шарт-шароитлар яратилмоқда.
Жумладан, валюта курси либераллаштирилди ва натижада ўзбек сўмининг курси барқарорлашди. Маъмурий ислоҳотлар концепцияси стратегик режалаштириш тизимини яратишни кўзда тутади. Унга кўра, «қисқа муддатли», «ўрта муддатли», «узоқ муддатли» каби тушунчалар киритилмоқда. 2018- йилдан бошлаб Ўзбекистон Республикаси ривожланиш дастурларини молиялаштириш ва шакллантиришнинг янги тартиби жорий этилди.
Тадбирда Ўзбекистонда илк бор Наманган шаҳрида 2018—2020 йиллар учун ўрта муддатли бюджет ишлаб чиқилгани ва халқ депутатлари шаҳар Кенгаши томонидан қабул қилингани таъкидланди. Услубий қўлланма БМТ Тараққиёт дастури ва Буюк Британиянинг мамлакатдаги элчихонаси техник кўмагида ишлаб чиқилди. Қўлланма ўрта муддатли бюджетлаштириш жараёнини тўлиқ ёритишга қаратилганлиги билан аҳамиятлидир.
Тақдимот жараёнида 2018—2020 йиллар учун прогноз лойиҳа намойиш этилди.
Изоҳ (0)