«Инсон ва қонун» нашрининг мухбирлари Янгийўл туманидаги уйларда истиқомат қилаётган айрим фуқаролар билан учрашиб, уларни қийнаётган муаммолар билан танишиб чиқди.
«Отангга бор... Онангга бор... ўртада кимдир абгор» сарлавҳали мақолани тайёрлаш жараёнида Янгийўл тумани Гулбаҳор қўрғони, 2 А-уйда истиқомат қилаётган айрим фуқаролар билан учрашиб, улар билан суҳбат қилишимизга тўғри келди.Шу мақсадда, фотомухбир билан ўша манзилга бордик. Кўп қаватли уй олдида биз қидириб борган фуқаролар билан суҳбат қилдик. Суҳбат жараёнида бизга назар ташлаб ўтиб қайтаётган қўшниларга суҳбатдошларимиз бизни булар журналист, муаммоимизни ўрганиш учун газетадан келишибди, дея таништиргандек бўлди. Айримлари бош силкиб, яна айримлари эса буларинг билан ҳам иш битмайди, дея қўл силтаб қўя қолишди. Шу аснода бизнинг суҳбатимизга ёши улуғроқ отахон келиб қўшилди.
«Сенлар қўлларингдаги шу қоғоз ручка-ю, ана у матоҳларинг (фотомухбир қўлидаги фотоаппаратга ишора қилиб) билан муаммони ҳал қилмоқчимисизлар? Буни ана у туман раҳбарларини бир жойга йиғиб, муаммони уларга кўрсатиб, қачон ҳал этилишигача сўрайдиган кўрсатув журналистлари бор-ку (Тошкент каналида эфирга узатиладиган «Очиқ мулоқот» кўрсатувини назарда тутяпти) ўшалар ҳам катта камералари билан икки марта келиб, телевизорда кўрсатишди. Ўшандаям туман раҳбарлари бу муаммони 3 кун ичида ҳал қиламиз, деб ваъда беришганди. Мана орадан икки йил ўтди ҳамки ҳеч нарса ўзгармади».
Шундан сўнг отахон билан анча вақт суҳбат қилиб, биз ўрганиш учун борган муаммо бошқа-ю отахон жон куйдириб айтаётган муаммо бошқалигини англадик. Отахон айтаётган муаммо шунда эдики, кўп қаватли уйга уланган канализация бир неча йилдирки таъмирга муҳтож ҳолда экан. Отахонга бизга ўша жойни кўрсацангиз газетага фотофакт қилиб берамиз дедик, шунда отахон: «Сенларга пакт керакми», дея 2 А-уй орқасига бошлади.
Юқоридаги манзилдан ишхона томон қайтар эканмиз, хаёлимга шулар келди: бугун кўпчилик таҳририятларда обуна масаласи қийин кечаётганлиги, ихтиёрий обуна камлиги, одамлар нега газета-журналлар ўқимаётганлиги кўп бор тилга олинади. Бунга биргина отахон айтган гаплардан жавоб топиш мумкин. Оммавий ахборот воситаларида нашр этилаётган, кўрсатилаётган муаммолар фақат саҳифаларда, флешкаларда қолиб кетмоқда, айрим раҳбарларни умуман қизиқтирмай ҳам қўйган. Ҳатто «ОАВда чиқарса чиқараверсин қўрқадиган жойим йўқ», дейдиган раҳбарлар ҳам йўқ эмас. Бу эса одамларнинг ўз-ўзидан ОАВга бўлган ишончининг сусайишига сабаб бўлмоқда. Натижа эса ихтиёрий обуна бўлиш у ёқда турсин, текин берсангиз ҳам газетани варақлагиси келмайди.
Ҳа, нима бўлганда ҳам биз юқорида тилга олинган туман мутасаддиларидан суратлардаги ҳолатни ижобий томонга ўзгартириб, ўша ҳудуд аҳолисининг туман раҳбарларига бўлган ишончини ҳам, ОАВга бўлган қизиқишини ҳам мустаҳкамлайди, деган умиддамиз.
Изоҳ (0)