Наманган вилоят ИИБ йўл ҳаракати хавфсизлиги бошқармаси томонидан Тўрақўрғон туманидан ўтувчи Фарғона ҳалқа автомобиль йўлининг 65 километрига инновацион ғоя асосидаги йўл патруль хизмати автомобили модели ўрнатилди. Бу ҳақда «Дарё»га вилоят ИИБ матбуот хизмати хабар берди.
Автомашинанинг олд ва орқа кўринишларини намойиш қиладиган моделнинг тунги вақтда маёқчалари ёнади. Бу ҳаракат иштирокчиларини огоҳликка чақириб, белгиланган тезликда ҳаракатланишларига ундаши кутилмоқда.
Ҳудуддаги симёғочларнинг ёритиш қисми ва асосларига диодли лампалар жойлаштирилиб, тунги вақтда ҳам етарли кўриниш даражаси таъминланди. Шунингдек, Тўрақўрғон тумани марказидаги пиёдалар ўтиш жойига ҳам огоҳлантирувчи маёқча ўрнатилди.
Мазкур ғояни оммалаштириш ва вилоятнинг бошқа ҳудудларидаги гавжум масканлар, умумий овқатланиш шахобчалари ҳамда савдо ва хизмат кўрсатиш марказларига яқин ҳудудларда жойлашган пиёдалар ўтиш жойларини худди шу тартибда жиҳозлаш мақсадида кўргазмали семинар ўтказилди.
Изоҳ (0)