Бирлашган Миллатлар Ташкилотининг Нью-Йоркдаги қароргоҳида БМТ ёшлар форуми бўлиб ўтди. Унинг доирасида Ўзбекистоннинг БМТдаги доимий ваколатхонаси томонидан республикада олиб борилаётган ёшлар сиёсати тақдим қилинди, деб хабар ёзади «Халқ сўзи».
«Тадбир иштирокчилари Ўзбекистондаги ёшлар сиёсатининг мазмун-моҳияти, Президент Шавкат Мирзиёев ташаббуси билан тузилган Ўзбекистон ёшлар иттифоқи фаолияти, унинг ўсиб келаётган авлодни ҳар томонлама қўллаб-қувватлаш билан шуғулланишга даъват этилгани, аҳолининг ушбу қатлами ҳуқуқлари ҳамда қонуний манфаатларини ҳимоя қилиш тизимининг тубдан ислоҳ этилишига доир маълумотлар билан яқиндан танишди», — дейилади хабарда.
БМТ форуми қатнашчиларининг асосий эътибори 2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини амалга оширишнинг бориши тўғрисидаги маълумотларга қаратилди.
Ёшлар форумининг очилиш маросимида БМТ котибияти, бошқа халқаро ташкилотлар, нодавлат нотижорат ҳамда ёшлар тизимларининг вакиллари иштирок этди.
Форум доирасида бўлиб ўтган ялпи йиғилиш, давра суҳбатлари ҳамда сексия тадбирлари чоғида ташкилотга аъзо давлатлар вакиллари ўз мамлакатларида ёшлар сиёсати соҳасида кўрилаётган чора-тадбирлар юзасидан ўзаро фикр алмашди. Унинг якунлари бўйича тегишли тавсиялар ишлаб чиқилди.
Изоҳ (0)