Доғистон бош вазири вазифасини вақтинча бажарувчи Абдусамад Гамидов сўроқ қилиш учун Федерал хавфсизлик хизматига келтирилди, деб ёзади «РБК». Унинг уйи эса тинтув қилинмоқда.
Баъзи маълумотларга кўра, тезкор тадбирлар бош вазир ўринбосарлари — Шамил Исаев ва Раюдин Юсуфовнинг уйларида ҳам олиб борилмоқда.
Бош вазир вазифасини бажарувчи тезкор тадбирлар доирасида тушунтиришлар бериши керак. Юсуфовни ҳам сўроқ учун олиб кетишгани айтилмоқда.
Мансабдорларнинг уйларидаги тергов тадбирлари, нашр манбасига кўра, ФХХ текширув комиссияси иши доирасида олиб борилмоқда. «Бунда гап ваколатларнинг суиистеъмол қилиниши ҳақида бормоқда», — дея қўшиб қўйди у.
Кенг кўламли прокурорлик текшируви Доғистонда ўтган ойда бошланди. Республика раҳбари вазифасини бажарувчи Владимир Василевнинг ташаббуси билан республикага коррупция ва хизмат ваколатларини суиистеъмол қилиш фактларини аниқлаш учун ИИВ ва ФХХ марказий аппаратидан терговчилар келди. Жиноий иш доирасида Maxачқалъа мэри ва шаҳар бош меъмори ҳибсга олинди. Шунингдек, «номаъқул» ишлари учун таълим ҳамда ер муносабатлари вазирлари ишдан четлатилди.
Изоҳ (0)