Инвестор Акбар Ашуровнинг отаси сурхондарёлик, онаси Тошкентда таваллуд топган, ўзи айни пайтда Буюк Британия фуқароси. Шу пайтгача Ўзбекистонда нон ва нон маҳсулотлари, қандолат, шоколад ишлаб чиқариш, қаҳвахона ва ресторан хизмати каби йўналишларда ўзини синаб кўрган ва муваффақиятга эришган, деб хабар беради ЎзА.
Тадбиркор бу гал кластер услубида пилла етиштириш, уни қайта ишлаш ва тайёр маҳсулот ҳолда экспорт қилишга катта сармоя киритиш истагини билдирди. Бу ҳақда унинг ўзи шундай ҳикоя қилади.
— Президент Шавкат Мирзиёев чет элда бизнес қилиб юрган ватандошларни юртга қайтишга, олдинги муаммоларни унутиб, Ўзбекистонда турли корхоналар, завод ва фабрикалар қуришга чақиргани менда катта таассурот қолдирди. Инвестиция киритиш учун қилган мурожаатим қўллаб-қувватланди. Тақдим этилган лойиҳалар орасида «Ўзбекипаксаноат» уюшмасининг ипакни қайта ишлаш корхонаси барпо этиш борасидаги таклифи менда қизиқиш уйғотди.
5 миллион долларга тенг лойиҳани амалга ошириш мақсадида Жиззах вилоятини танладим. Бизга 11,5 миллиард сўм инвестиция киритиш ва 120 иш ўрни яратиш шарти билан бир гектардан кўпроқ ер майдони ноль қийматда ажратиб берилди. Ҳозир қурилиш ишлари жадаллик билан бормоқда. Ипак етиштириш мавсуми бошлангунча, корхонамиз ишга тушади. Ипакни йигириш ускуналарини Хитойдан, мато ишлаб чиқариш жиҳозларини Европадан олиб келиш борасида шартнома тузганмиз.
Ҳали корхонамиз ишга тушмасидан буюртмалар тушмоқда. Эрон, Туркия, Покистон, Озарбайжон, Вьетнам каби қатор давлатлар ипак толасини харид қилиш истагини билдирмоқда. Корхона биринчи босқичда йилига 144 тонна қуруқ пиллани қайта ишлайди, йил охирига бориб, 2 миллион долларлик маҳсулот экспорт қиламиз.
2019 йилда ипак матолар ва улардан кийим-кечаклар ишлаб чиқаришни бошлаймиз. Корхонанинг тўлиқ қувватда ишлаши 2022 йилга мўлжалланган. Унга қадар 480 доимий ва 10 мингта мавсумий иш ўрни яратилади. Мақсад пиллани қайта ишлашдан тортиб экспорт учун мато, кийим-кечак ва гилам ишлаб чиқариш жараёнигача бўлган барча босқичларни тўлиқ қамраб олишдан иборат.
Тизимда кластер ташкил этиш тажрибасини қўллаб-қувватлайман. Шу боис корхона қошида 6 та инновацион қуртхона қурилади. Уларнинг атрофида 180 гектар тутзор яратиш, смарт технологиялар ва ноу-хауларга асосланган янгича ишлаб чиқариш услубини йўлга қўйиб, бир йилда уч марта ҳосил олинади, экспорт имконияти янада ошади.
Изоҳ (0)