TechCrunch нашри журналистлари Phantom АI мустақил бошқарув технологияси билан жиҳозланган Hyundai Genesis автомобилида ҳаракатланиш чоғида ЙТҲга учради. Ҳодиса АҚШнинг Калифорния штатида юз берган. Бу ҳақда TJournal хабар берди.
Мухбирларнинг ҳикоя қилишича, технология намойиши чоғида пикаплардан биридан яхши маҳкамланмаган чиқинди идиши тушиб кетган. Ҳайдовчисиз автомобилнинг одидан кетаётган Nissan Rogue кутилмаган тўсиқнинг устига юриб кетмаслик учун тормозлаган. Hyundai Genesis ҳайдовчиси ҳам тўқнашувдан қочишга уринган, бироқ тахминан 30 км/соат тезликда Nissan’га урилган.
Нашрнинг уч нафар ходим билан бирга, автомобилда Phantom АI жамоасининг икки аъзоси: компаниянинг асосчиси ва бош директори Хьюнги Чо ҳамда президент ва таъсисчи Чан Кю Ли бўлган. Ли синов вақтида рулда бўлган.
ЙТҲда ҳеч ким жабрланмаган. Hyundai Genesis кузовининг олд томони шикастланган. Чонинг айтишича, автомобилга автоматик авария тормозлаш тизими ўрнатилган, бироқ баъзи камчиликлари борлиги ва синовдан ўтаётгани сабабли бу сафар у ўчирилган эди. Қўл тормози тезликни бироз камайтиришга ёрдам берган, бироқ тўқнашувнинг олдини ола олмаган.
Изоҳ (0)