Украинанинг Донецк вилоятидаги Malaysia Airlines самолёти ҳалокати қурбонларининг қариндошлари АҚШда Стрелков тахаллуси билан машҳур бўлган Игорь Гиркинга қарши суд даъвосида ютиб чиқди, деб ёзади Meduza.
Марҳумларнинг 25 нафар қариндоши томонидан берилган коллектив даъво Иллинойс штати Шимолий округи Округ судига берилган эди. Даъвогарлар Гиркин самолёт йўловчилари ва экипажи ҳалокати учун жавобгар эканлигини айтиб, товон пули талаб қилган эди.
Самолёт ҳалокатга учраган 2014 йил июлида Гиркин Донецк халқ республикаси қўшинларига қўмондонлик қилган эди.
Суд даъвони декабрда қондирган. Ҳар бир даъвогарга руҳий компенсация сифатида 10 миллион ва етказилган зарар учун компенсация сифатида яна 10 миллион доллар тўлашга ҳукм қилинган.
Boeing 777 самолёти айирмачилар назорати остидаги Шарқий Украина осмонида 2014 йил 17 июлида уриб туширилди. Бунинг оқибатида унинг бортидаги 298 киши ҳалок бўлди.
Изоҳ (0)