Фарғона вилояти ИИБ пост-патруль хизмати баталони кадрлар гуруҳи катта инспектори Каримжон Камоловнинг келажаги порлоқ эканига ҳамма ишонарди. Афсуски, у бу ишончни оқламади, дея хабар беради ЎзА.
Бинойидек ишлаб юрган бу инспектор тўғри йўлдан адашди. 2014 йил охирларида ички ишлар тизимида ишлаётган У.Йўлдошев Каримжонни тушликка таклиф этиб, М. Эшпўлатова билан таништиради.
М.Эшпўлатова анчадан буён ўғлини ички ишлар идорасига ишга жойлаштиришни ўйлаб юрарди. Гап орасида ундан ички ишлар идорасига ишга олиб кириб қўйиш неча пул бўлишини сўради. Суҳбат асносида К.Камолов 4 минг доллар бўлиши ва ИИБга ишга кириш тартибини тушунтириб, агар зарурат туғилса, ёрдам бериши мумкинлигини билдирди.
М.Эшпўлатова ўғлини ички ишлар идорасига ишга олиб кириб қўйишни илтимос қилиб анча юрди. У.Йўлдошев нафақага чиққандан сўнг, 2017 йилда июль ойида К.Камолов билан учрашиб, М. Эшпўлатованинг ўғли ҳалиям ИИБга ишга кира олмаганини айтади. Ишга киритиб қўйиш қанча бўлишини сўрайди. К.Камолов 3 минг доллар кетишини, аммо бу иш қўлидан келмаслиги, шундай бўлса-да, ҳаракат қилиб кўришини айтади. Каримжон ишга киритиш учун кетадиган «харажат»нинг маълум қисмини олиш таклифига кўнди.
Миллий хавфсизлик хизмати Фарғона вилояти бошқармаси ҳамда Бош прокуратура ҳузуридаги департамент вилоят бошқармаси томонидан ўтказилган тезкор тадбирда К. Камолов М.Эшпўлатова ҳамда У.Йўлдошевдан 500 долларни пора сифатида олаётганида ашёвий далил билан қўлга олинди.
Жиноят ишлари бўйича Фарғона шаҳар суди ҳукмига биноан К.Камолов 5 йил муддатга озодликдан муҳрум қилинди.
Изоҳ (0)