Ўзбекистонда 2023 йилгача 10 мингта инновацион пиллахона қурилади

«Ўзбекипаксаноат» уюшмасида Ўзбекистонда пилла етиштиришни кўпайтириш бўйича «йўл харитаси» ишлаб чиқилди. Бу ҳақда ЎзА хабар бермоқда.

«Йўл харитасига кўра келгусида йил давомида ипак қуртини 3—4 марта парваришлаб, мўл ҳосил олиш мумкин. Тутзорларда паррандачилик ва асаларичилик, чорвачилик ва қуёнчиликни ривожлантириш, иккиламчи қишлоқ хўжалиги маҳсулотлари етиштириш имконияти бўлади. Бунинг учун ҳар 5 гектар тутзорда биттадан инновацион пилла етиштириш маскани барпо этилади», — дейилади хабарда.

Айни вақтда «Ўзбекипаксаноат» уюшмасида инновацион пиллахоналар қуриш ишлари қизғин бормоқда.

2017 йилда Сурхондарё, Қашқадарё, Бухоро, Андижон ва Фарғонада 150 дан ортиқ инновацион пиллахоналар қурилиб, фойдаланишга топширилди. Уларда йилига икки марта, ҳаттоки Сурхондарё ва Бухоро вилоятларида уч марта ипак қурти боқилиб, мўл ҳосил етиштирилди.

Қайд этилишича, жорий йилда яна мингта, 2023 йилгача 10 мингта ана шундай инновацион пиллахоналар қурилиб, тайёр маҳсулотлар экспорти бир миллиард долларга етказилади.