27 январь куни Москва давлат Кремль саройидаги « ‘Романсиада’ юлдузлари» гала-концертида Ўзбекистон халқ артисти, жаҳон операсининг энг ёрқин тенорларидан бири Рамиз Усмонов иштирок этди. Бу ҳақда Art Uz Promotion Agency «Дарё»га маълум қилди.
Рамизнинг саҳнага чиқиши, шунингдек, унинг жозибадор ижроси гулдурос қарсаклар билан кутиб олинди. Томошабинлар анча вақт машҳур тенорни саҳнадан қўйиб юборишни истамади.
«Романсиада» рус романси халқаро танлови билан Рамиз Усмоновни узоқ муддатли ва мустаҳкам дўстлик боғлаб туради. У 2008 йилда Қозоғистондаги «Романсиада - 2008» ҳудудий танловида биринчи мукофот, Россиядаги «Романсиада - 2008» халқаро танловининг иккинчи даражали мукофоти соҳибига айланган.
Байрамона мусиқий кечада Рамиз «Турандот» операсидан Калаф ариясини ижро этди. Бундан ташқари, Кремль саройи саҳнасида Рамиз Усмонов ва беларуслик машҳур тенор Владимир Дмитрук ижросида рус халқ қўшиқлари янгради.
Изоҳ (0)