Қаршининг «Насаф» клуби Осиё Чемпионлар Лигасининг гуруҳ босқичида ўйнаш имкониятини қўлга киритди. Мазкур мусобақада «Локомотив» Ўзбекистон чемпиони сифатида иштирок этади.
«Насаф» плей-офф босқичида Иорданиянинг «Ал-Файсалий» клубини қабул қилиб, 5:1 ҳисобида зафар қучди. Беллашувда қаршиликлар сафидаги легионер футболчилар ҳам, Осиё Чемпионати U23 қаҳрамонлари ҳам ўзини кўрсатди. Шораҳмедовнинг ўрнига олиб келинган Лукич биринчи голга узатма берди, бошқа бир легионер Голбан ундан унумли фойдаланди. Клуб етакчиси Черан эса тўртинчи голни ўз ҳисобига ёзиб қўйди.
Осиё Чемпионатида иштирок этган футболчилар гарчи ўйиндан бир кун олдин Қаршига етиб келган ва камида 1 ой давомида жамоаси билан машғулот ўтказа олмаган бўлса-да, майдонга чиқарилди. Бош мураббий Рўзиқул Бердиевнинг бу қарори ўзини оқлади. Аввалига Бобур Абдухолиқов гол урган бўлса, кейинроқ Азиз Ғаниев ўз номини таблога ёздириб қўйди.
«Насаф» Чемпионлар Лигасининг «C» гуруҳида Амирликларнинг «Ал-Васл», Қатарнинг «Ас-Садд» ҳамда Эроннинг «Персиполис» клубларига қарши кураш олиб боради.
Чемпионлар Лигаси Плей-офф босқичи 30 январь, сешанба
«Насаф» — «Ал-Файсалий» (Иорлания) 5:1
Голлар: Игорь Голбан, 12 (1:0). Бобур Абдухолиқов, 49 (2:0). Азиз Ғаниев, 52 (3:0). Драган Черан, 61-пен (4:0). Ёсир Ар-Равашдеҳ, 86-авт (5:0). Албан Меҳа, 93+«Насаф»: Санжар Қувватов — Славко Лукич, Игорь Голбан, Умар Эшмуродов, Шароф Муҳитдинов — Одил Ҳамробеков (Санжар Рашидов, 80), Азиз Ғаниев (Ғолиб Ғайбуллаев, 76) — Ислом Кенжабоев, Драган Черан, Жасур Ҳасанов (Дониёр Нарзуллаев, 70) — Бобур Абдухолиқов.
Бугун — 30 январь куни Тошкент вақти билан 22:00 да «Пахтакор» ҳам гуруҳ босқичи йўлида майдонга чиқади. Шота Арвеладзе жамоаси бу йўлда Қатарда бўлиб турибди. Рақиб — «Ал-Гарафа».
Изоҳ (0)