Шавкат Мирзиёев Абу Муин Насафий мақбарасини зиёрат қилди. Бу ҳақда Президент матбуот хизмати маълум қилди.
Давлат раҳбари бу ерда амалга оширилган қурилиш ва ободонлаштириш ишларини кўздан кечирди.
Шавкат Мирзиёев 2017-йилнинг 24—25-февраль кунлари Қашқадарё вилоятига ташрифи чоғида Абу Муин Насафий мақбарасини обод зиёратгоҳга айлантириш, зиёратчиларга зарур шароитлар яратиш, бу масканда кутубхона ташкил этиш, буюк олим асарларини таржима қилиб, халққа етказиш бўйича тавсиялар берган эди.
Шунга мувофиқ бу ерда катта бунёдкорлик ишлари амалга оширилмоқда. Ақида илми бўйича мактаб, кутубхона қурилмоқда.
Давлат раҳбари уламолар билан суҳбатда Абу Муин Насафий асарлари бугунги кун учун ҳам ғоят аҳамиятли экани, уларни нашр қилиб, мазмун-моҳиятини ёш авлодга етказиш зарурлигини таъкидлади.
Мазкур зиёратгоҳда Қуръони каримнинг асл қўлёзма нусхаси сақланмоқда. Бу китоб қадимги Самарқанд қоғозига битилган, хаттотлик элементлари билан безатилган. Шавкат Мирзиёев бундай китоблар халқнинг бебаҳо мероси экани, уларни асраб-авайлаш кераклигини қайд этди.
Ўзбекистон Президентининг Қашқадарё вилоятига ташрифи давом этмоқда.
Изоҳ (0)