Shavkat Mirziyoyev Abu Muin Nasafiy maqbarasini ziyorat qildi. Bu haqda Prezident matbuot xizmati ma’lum qildi.
Davlat rahbari bu yerda amalga oshirilgan qurilish va obodonlashtirish ishlarini ko‘zdan kechirdi.
Shavkat Mirziyoyev 2017-yilning 24—25-fevral kunlari Qashqadaryo viloyatiga tashrifi chog‘ida Abu Muin Nasafiy maqbarasini obod ziyoratgohga aylantirish, ziyoratchilarga zarur sharoitlar yaratish, bu maskanda kutubxona tashkil etish, buyuk olim asarlarini tarjima qilib, xalqqa yetkazish bo‘yicha tavsiyalar bergan edi.
Shunga muvofiq bu yerda katta bunyodkorlik ishlari amalga oshirilmoqda. Aqida ilmi bo‘yicha maktab, kutubxona qurilmoqda.
Davlat rahbari ulamolar bilan suhbatda Abu Muin Nasafiy asarlari bugungi kun uchun ham g‘oyat ahamiyatli ekani, ularni nashr qilib, mazmun-mohiyatini yosh avlodga yetkazish zarurligini ta’kidladi.
Mazkur ziyoratgohda Qur’oni karimning asl qo‘lyozma nusxasi saqlanmoqda. Bu kitob qadimgi Samarqand qog‘oziga bitilgan, xattotlik elementlari bilan bezatilgan. Shavkat Mirziyoyev bunday kitoblar xalqning bebaho merosi ekani, ularni asrab-avaylash kerakligini qayd etdi.
O‘zbekiston Prezidentining Qashqadaryo viloyatiga tashrifi davom etmoqda.
Izoh (0)