Ўзбекистон ва Беларусь Фавқулодда вазиятлар вазирликларининг 2017–2018 йилларда фавқулодда вазиятларнинг олдини олиш ва уларни бартараф этиш бўйича ҳамкорликдаги тадбирлар режасига асосан Беларусь Фавқулодда вазиятлар вазири ўринбосари А. Худолеев бошчилигидаги делегация 25 январь куни Ўзбекистонга ташриф буюрди. Бу ҳақда ФВВ хабар бермоқда.
27 январда ФВВ Фуқаро муҳофазаси институтида икки мамлакат қутқарувчилари ҳамкорлигидаги ўқув машғулотининг тантанали очилиш маросими ўтказилди. Унда фавқулодда вазиятлар вазири Р. Джураэв тадбирни очиқ деб эълон қилди ва икки давлат мадҳияси янгради. Шундан сўнг авария-қутқарув асбоб анжомлари, махсус техника воситалари кўргазмаси ташкил этилиб, зилзилани симуляция қилиш марказига экскурсия ташкил этилди.
Шунингдек, меҳмонлар Яшнобод туманида ўтказилган ўқув машғулотида бўлди. Ўқув машқида икки давлат қутқарувчилари шартли равишда юзага келган фавқулодда вазият — зилзила оқибатида ёнғинлар келиб чиқиши, шунингдек меҳмонхона биносининг қулаши натижасида жабрланганларни қутқариш ишларини амалга оширди. Мазкур тадбирда туман ҳокимияти вакиллари, ФВДТ куч воситалари, Фуқаро муҳофазаси институтининг магистрлари, Давлат техника университети талабалари ҳамда Олмазор политехника касб-ҳунар коллежи қутқарувчи ўқув гуруҳи ўқувчилари иштирок этди.
Ҳамкорликдаги ўқув машғулоти 28–29 январь кунларига қадар Тошкент вилоятининг Чимён тоғли ҳудудида «Тоғли ҳудудларда жабрланганларни қидириш ва эвакуация қилиш тадбирларини олиб боришда қутқарув тузилмаларининг ҳамкорликдаги ҳаракатлари» мавзусида ўтказилиши ҳам режалаштирилган.
Изоҳ (0)