Ислом Каримов номидаги илмий-маърифий ёдгорлик мажмуасида Биринчи Президент таваллудининг 80 йиллиги арафасида кўргазма зали очилди. Бу ҳақда ЎзА хабар бермоқда.
Унда Ислом Каримов хотирасига бағишланган «Бутун оламни жо қилган юрак» кўргазмаси иш бошлади.
Кўргазма очилишига бағишланган маросимда Олий Мажлис Сенати аъзолари, Қонунчилик палатаси депутатлари, ҳукумат, вазирлик ва идоралар масъул ходимлари, фан, маданият, адабиёт ва санъат намояндалари, ёшлар, кенг жамоатчилик вакиллари иштирок этди.
Маросим иштирокчилари Ислом Каримов ҳаёти ва фаолиятига бағишланган бадиий кўргазма экспонатлари билан танишди. Кўргазма 2 залга бўлинган. Биринчи залда рассомларнинг 57, ҳайкалтарошларнинг 3 асари намойиш этилмоқда. Иккинчи залдан фоторассомларнинг 80 та ижодий иши ўрин олган.
Шу куни Ислом Каримов ҳайкали пойи гулларга бурканди. Кенг жамоатчилик вакиллари Биринчи Президент хотирасига ҳурмат бажо келтирди.
Тантанали тадбирда Президентнинг Давлат маслаҳатчиси Х. Султонов, Биринчи Президентнинг рафиқаси Т.Каримова, Ислом Каримов номидаги илмий-маърифий ёдгорлик мажмуаси раҳбари Т.Ширинов ва бошқалар сўзга чиқди.
Изоҳ (0)