Самарқанд шаҳри ҳокими Фурқат Раҳимов Испанияга сафари чоғида сайёҳлик соҳасини ҳамда иқтисодиётнинг бошқа тармоқларини ривожлантириш юзасидан Валенсия орттирган тажрибани ўрганиш мақсадида мазкур провинцияда бўлди. Бу ҳақда «Жаҳон» ахборот агентлиги хабар бермоқда.
Минтақага сафар доирасида Валенсия автоном ҳамжамияти ҳукуматининг раиси Хайме Пуиж, унинг сайёҳлик бўйича ўринбосари Франциск Коломер, Испания Конгресси депутати, ЮНЕСКОнинг «Ипак йўли» дастури мувофиқлаштирувчиси Хосе-Мариа Чикиё, ушбу минтақанинг Сайёҳлик агентликлари федерацияси президенти Сальвадор Аморос ҳамда сайёҳлик фирмалари, шароб ишлаб чиқариш, гастрономия бизнеси ва тўқимачиликка ихтисослашган компанияларнинг вакиллари билан учрашув ҳамда музокаралар ўтказилди.
Музокаралар якунлари ўлароқ, 2018 йилнинг биринчи ярмида Валенсия ва Самарқанд ўртасида биродарлашган шаҳарлар алоқаларини ўрнатиш бўйича Протокол имзолаш юзасидан дастлабки келишувга эришилгани баробарида «Валенсияда Самарқанд кунлари» деб номланган йирик маданий-сайёҳлик тадбирини ўтказишга ҳам келишиб олинди.
Валенсия мухтор провинцияси Испаниянинг энг кўҳна минтақаларидан бири ҳисобланади. Сайёҳлик жабҳаси Валенсия иқтисодиётида энг муҳим ўринни эгаллайди. Бу соҳа минтақа иқтисодиёти тизимининг салкам 15 фоизини ташкил қилади. Мухтор провинциянинг 15 фоиздан зиёд меҳнатга лаёқатли аҳолиси ушбу жабҳада фаолият кўрсатади. Кейинги йиллар давомида сайёҳлик мазкур минтақа иқтисодий ривожланишининг ҳаракатлантирувчи кучига айланди.
Изоҳ (0)