АҚШ қуролли кучлари вертолёти Анбар вилоятиниг ал-Бағдодий минтақасида хатолик сабаб Ироқ хавфсизлик кучларига тегишли автомобилни ўққа тутди. Оқибатда саккиз киши ҳалок бўлди, 20 киши яраланди, дея хабар бермоқда «РБК».
Кўп ўтмай АҚШ бошлиқ коалиция кучлари мазкур хато зарба юзасидан баёнот берган. Унда таъкидланишича, бу террорчилик гумон қилинаётган шахслардан бирини излаш билан боғлиқ рейд вақтида юз берган. Қўмондонлик мазкур ҳолат юзасидан суриштирув олиб борилишини билдирган.
Alsumaria телеканали ахборотига кўра, ўққа тутилганлар орасида Ал-Бағдодий шаҳри полицияси бошлиғи ва ҳудуд маъмурияти раҳбари ҳам бўлган. Улар маҳаллий қабилалардан бирининг шайхи билан учрашувга кетаётган бўлган.
Декабрь ойи бошида Ироқ ҳукумати мамлакатда ИШИД террорчилик ташкилоти устидан тўлиқ ғалаба қозонилганини эълон қилган эди. Ироқ бош вазири Ҳайдар ал-Ободийнинг сўзларига кўра, мазкур террорчи ташкилот кучлари «Ироқда тўлиқ тор-мор этилиб, мамлакатдан ташқарига чиқариб ташланди».
Изоҳ (0)