Ўзбекистон Президенти Шавкат Мирзиёев 24 январь куни Жанубий Корея президенти Мун Чже Ин билан телефон орқали мулоқот қилди, дея хабар бермоқда Ўзбекистон Президенти матбуот хизмати.
Жанубий Корея президенти кўп миллатли Ўзбекистон халқини шу кунларда Хитойда бўлиб ўтаётган футбол бўйича Осиё чемпионатида Ўзбекистон U23 (ёшлар) терма жамоаси кўрсатаётган «ажойиб ўйин» ва ўзбекистонликлар мусобақа финалига чиққани билан самимий қутлаган.
Ўз навбатида, Шавкат Мирзиёев Жанубий Корея раҳбарияти ва халқига Пхёнчханда ташкил этиладиган ва жаҳон спорти тарихига кирадиган қишки Олимпия ўйинлари муваффақиятли ўтишини чин дилдан тилаган.
Маълумот учун, футбол бўйича Ўзбекистон U23 терма жамоаси 23 январь куни Хитойда давом этаётган Осиё чемпионати ярим финалида Жанубий Корея терма жамоасини қўшимча вақтларда 4:1 ҳисобида мағлуб этган эди. Ўзбекистонлик футболчилар мусобақа финалида Вьетнамга қарши ўйнайди. Ўйин 27 январь, шанба куни Тошкент вақти билан 13:00 да бошланади.
Жанубий Кореянинг Пхёнчхан шаҳри 9—25 февраль кунлари ҳисоб бўйича 23-қишки Олимпиада ўйинларига мезбонлик қилади. Унда Ўзбекистондан икки спортчи — Миша Ге (фигурали учиш) ва Комилжон Тўхтаев (тоғ чанғи спорти) қатнашади.
Изоҳ (0)