Футбол бўйича Ўзбекистон миллий терма жамоасининг собиқ бош мураббийи Самвел Бабаян арманистонлик журналист томонидан ёзилган миллатчилик руҳидаги мақолага изоҳ берди. Унинг бу борадаги фикри «Xabar.uz»да чоп этилди.
Самвел Бабаян футболдан миллати учун четлатилдими ёки нафси?
Айтилишича, нашр миллатчилик руҳидаги мақола юзасидан бир қатор танқидий чиқишлар қилган. Бу ҳақда хабар топган Самвел Бабаян ҳатто бетоб бўлиб қолган. Шуни важ қилиб, мақолаларни олиб ташлашни сўраган. Бироқ «Xabar.uz» бунга рози бўлмаган ва Бабаяннинг фикрини сўраган. Бунга жавобан Самвел ўз позицияси билдирилган мактуб жўнатган. Унда қуйидаги сўзларни учратиш мумкин:Сизнинг провокацион мақолангизни ўқиб, чуқур таажжубда қолдим. Қандай маънавий ҳаққингиз борки, асл вазиятни билмай туриб, бизнинг ватанимизда миллатчилик борлиги ҳақида ёзасиз!Мен, Бабаян Самвел, бу буюк давлатнинг фуқароси эканлигимдан фахрланаман. Мен ўзбек маҳалласида туғилганман ва менинг биринчи сўзларим ўзбекча бўлган. Бу Ватанга муҳаббат менга она сутим билан кирган, Ўзбекистон ифтихори бўлган фарзандларим ва шогирдларимни ҳам айнан шундай руҳда тарбиялайман. Менинг ватанимда бағрикенглик жуда кенг, ҳар бир шахсга миллати ва диний қарашларидан қатъи назар, ўзини намоён қилиш учун тенг имкониятлар берилган.
Менинг миллатим арманлиги, мамлакат миллий терма жамоасига бош мураббий этиб тайинланганимнинг ўзи ҳам фикримнинг яққол исботидир ва бундай мисоллар талайгина.
Сизнинг Ўзбекистон ва ўзбек халқи ҳақидаги сўзларингиз масъулиятсизлик ва ҳатто жиноятдир. Мен бу халқнинг фазилатлари ҳақида бир умр гапиришим мумкин, лекин бундай қилмайман — чунки бутун дунё сиздан фарқли равишда бу ҳақда яхши билади. Ким Ўзбекистонга бир марта ташриф буюрса, уни бутун умр севиб қолиши аниқ.
Сиздан менинг она ватаним Ўзбекистон ҳақида келгусида маънисиз ва ҳеч қандай асосга эга бўлмаган мақолалардан тийилишни сўрайман. Зеро, мен шу давлатнинг фуқаросиман ва бундан фахрланаман.
Сиз кимсизки, ўз ҳаётини, бор салоҳиятини халқи фаровонлигига бағишлаган президентимизга баҳо берасиз?! Менинг бу сўзларимга асрлар давомида бу муаззам заминда яшаётган арман миллатига мансуб барча юртдошларим қўшилишига аминман.
Ўзингизнинг бундай хомхаёлларга асосланган ва ҳақиқатдан узоқ бўлган фикрларингизни чоп этишдан олдин менинг она юртим Ўзбекистонга келишни ва бу ерда турли миллатлар қандай тотув яшаётганини, ватанимиз қанчалик ривожланаётганини, дунё ҳамжамиятида ўз ўрнини мустаҳкамлаётганини ўз кўзингиз билан бир бор бўлса-да кўришни таклиф қилган бўлардим.
Менинг футболдан четлаштирилишим бу фаолиятда мунтазам кузатиладиган жараён бўлиб, мен буни ҳеч ким билан, айниқса сиз билан муҳокама қилмоқчи эмасман ва ҳар бир гапимга жавоб беришга тайёрман.
Мен сизнинг бундай провокацион мақолани эълон қилишдан мақсадингиз нима эканини билмайман, лекин, унутмангки, мен ёки миллатдошларим ҳақида ёзаркансиз, журналистик одобга кўра ўзим ёки Ўзбекистонда яшовчи бирорта арман миллатига мансуб фуқародан миллатлараро муносабат ҳақида фикр олишингиз зарур эмасмиди?
Менинг бу ҳолатга муносабатимни ҳисобга олиб, сиздан бу мақолангиз учун узр сўрашингизни талаб қиламан ҳамда келгусида бундай мавзуларни кўтаришда аниқ маълумотларга асосланишни ва жуда эҳтиёт бўлишни тавсия этаман.
Бабаян Самвел (18.01.2018.)
Москванинг «Спартак» клубида тажрибасини ошираётган Самвел Бабаян яқиндагина ЎФФ қарори билан футболдан четлаштирилганди.
Изоҳ (0)