ЎзА Самарқанд вилояти Оқдарё туманидаги 63-махсус ёрдамчи мактаб-интернатига ҳукумат томонидан етарлича эътибор қаратилган бўлса-да, ундаги шароитлар ачинарли аҳволга келиб қолгани тасвирланган суратларни тақдим этди.
Вилоят халқ таълими бошқармасига қарашли ушбу таълим муассасасида бугунги кунда 297 нафар ўқувчи таҳсил олмоқда. Уларга 106 нафар ўқитувчи ва тарбиячи сабоқ беради.
Муассаса раҳбари М.Саидмуродовнинг айтишича, дастур асосида 2013 йилда мактаб ётоқхонаси таъмирланиб, ўқувчилар учун замонавий қулайликлар яратилган. Табиий газ ва кўмир билан иситишга мўлжалланган қозонхона ўрнатилган. Газ босими пасайганда кўмирдан фойдаланилади. Ўтган йили эса 1 миллиард 200 миллион сўм маблағ сарфланиб, ўқув биноси ва спорт зали капитал таъмирланган. Бино иситиш тизими янгиланган. Жорий мавсум учун мактабга 69 тонна кўмир ажратилган. Лекин айрим синфларда ўқитувчи ва ўқувчилар пальтода ўтиргани бинонинг етарли даражада иситилмаётганини кўрсатади.
Мактаб ҳовлисида ташкил этилган иккита иссиқхонада бугунги кунда кўкат ва лимон парваришланаётгани эътиборга лойиқ, албатта. Аммо ана шу катта ҳовлидаги болалар майдончалари ва спорт майдонларининг қаровсизлиги, маънан эскирган қурилмалардан фойдаланилаётгани тушунарсиз. Ётоқхона биноси олдидаги болалар майдончасидаги ўтирғич ва ўйин қурилмалари аллақачон яроқсиз ҳолга келиб қолган. Йўлаклар четидаги панжараларга болаларнинг ювилган кийим-кечаклари илиб қўйилганини кўриб, наҳотки муассасада кирхона бўлмаса, деган савол туғилади. Кирхона бор, бунинг устига замонавий ювиш, қуритиш, дазмоллаш ускуналари ҳам ўрнатилган. Шундай имконият бўлатуриб, нега кир ташқарида қуритилмоқда?
Ҳовлидаги ҳожатхона антисанитария ҳолатида бўлиши баробарида, болаларнинг юз-қўл ювишига мўлжалланган воситалар ҳам ўтган асрдан мерос қолган эскича усулда – сув қувури бир неча жойидан тешиб қўйилган, холос.
Муассаса ходимлари ётоқхонада ҳар томонлама қулай ҳожатхона, ювиниш хоналари борлигини айтишган ва қулфланган бу хоналарни очиб кўрсатишган. Ҳақиқатдан ҳам, бу ерга сув иситиш воситалари ўрнатилган. Лекин улардан қачон фойдаланилади?
Ётоқхоналарда диванлар қўйилган. Аммо бу ерда кийим-кечак, шахсий гигиена воситаларини сақлаш имконияти йўқ. Масъуллар бу воситалар ҳар бир гуруҳнинг ишчи хонасида сақланишини айтишди. Лекин биз кўрган битта ишчи хонада ҳам кийим-кечак сақлаш учун шкаф, амалда фойдаланилаётган шахсий гигиена ашёлари тўлиқ эмас эди. Бошқа ишчи хоналар калити тарбиячиларда экани сабабли уларни кўришнинг имкони бўлмади.
Ўғил болаларга мўлжалланган учинчи қаватда бирорта ҳам ишчи хона йўқ. Бундан шундай хулоса чиқадики, бу қаватда турадиган ўқувчилар сочиғи, совун ёки тиш пастасини олиш учун биринчи ёки иккинчи қаватга тушиши керак.
Ошхонага киришда ўқувчилар кийимини ечиб қўйишлари учун шкаф ёки илгичлар йўқ. Бу ерда ҳам қўл ювиш воситалари мавжуд, аммо улардан яқин орада фойдаланилмагани шундоқ кўриниб турибди.
Изоҳ (0)