Asia Alliance Bank Ягона халқаро процессинг маркази (GlobUz) билан ҳамкорликда валюта айирбошлаш операцияси функциясига эга Ўзбекистондаги биринчи банкоматни тақдим этди, деб ёзади «Газета.uz». Ўз-ўзига хизмат кўрсатиш қурилмаси 15 январь куни ишга туширилди.
Asia Alliance Bank бош офисида жойлашган, бугунги кундаги ягона банкомат нақд АҚШ долларини нақд сўмга айирбошлаш имконини беради. Тез орада банкнинг барча филиалларини ва филиалдан ташқари нуқталарни бундай валюта айирбошлаш банкоматлари билан жиҳозлаш режалаштирилмоқда.
Айирбошлаш пункти курси бўйича нақд пулни айирбошлашни банк ходимлари иштирокисиз амалга ошириш мумкин, бу эса хизматни тун-у кун тақдим этиш имконини беради. Яқин вақтларда евро ва Россия рублини айирбошлаш ишга туширилади.
«Техник жиҳатдан олиб қараганда, тизим тескари операцияларни ҳам амалга ошира олади, аммо битта ньюанс бор — янги 10 минг ва 50 минглик купюралар банкоматларни ишлаб чиқувчилар базасида ҳали мавжуд эмас, бу эса купюранинг ҳақиқийлигини текшириш имконини бермайди. Айни пайтда ушбу купюраларни базага киритиш ишлари олиб борилмоқда, бу тез орада амалга ошади, деб ўйлайман. Агар нақд чет эл валютасини сотишга қонуний тарзда рухсат беришса, бундай функцияни ҳам амалга ошириш мумкин», — деди Ягона халқаро процессинг маркази бош директори Шуҳрат Қурбонов.
Чиқариб бериладиган сўмлар 1000, 5000, 10 000 ва 50 000 сўм номиналли 2000—2500 та банкнотали тўртта кассетада сақланади. «Фақат битта чеклов бор — банкомат бир мартада 40 та банкнота, тахминан 240 доллар чиқариб бериши мумкин. Статистикага кўра, одамлар кўпинча айирбошлаш пунктида 100—300 доллар айирбошлайди», — деди GlobUz раҳбари.
Ҳозирда банкоматлар GlobUz карталарини ҳам қабул қилади, аммо яқин ойлар ичида Visa, Master Card ва UnionPay карталарини ҳам интеграция қилиш режалаштирилмоқда. Шунингдек, Ягона умумреспублика процессинг маркази (UzCard) билан интеграциялашув бўйича ишлар ҳам олиб борилмоқда.
Изоҳ (0)