Фарғона вилоят ИИБ қошида ташкил этилган кутубхонанинг очилиш маросими бўлиб ўтди. Бу ҳақда «Дарё»га ИИБ матбуот хизмати маълум қилди.
Тадбирда вилоят ҳокими Шуҳрат Ғаниев, вилоят ИИБ бошлиғи Раҳматжон Маматов, вилоят прокурори Садриддин Турдиев, ИИБ шахсий таркиби ва фахрийлари, ўқувчи-ёшлар иштирок этди.
«Бошқарма қошида кутубхона ташкил этилиши бежиз эмас. Китоб ўқимай, китоб ўқиш кўникмасини шакллантирмай ҳеч нарсага эришиб бўлмаслигини бугунги куннинг ўзи кўрсатиб турибди. Жумладан, ички ишлар органлари ходимлари ҳам фаолиятимиз, халқ билан очиқ мулоқот қилиш, энг асосийси, дунёқарашимиз, фикрлаш дорамизни кенгайтириш, фарзандларимиз, касбдошларимизга намуна бўлишда албатта китобга мурожаат қилишимиз лозим», — дейди вилоят ИИБ бошлиғи, полковник Раҳматжон Маматов.
Вилоят ИИБ кадрлар бошқармаси ҳамда Аҳмад Фарғоний номидаги Фарғона вилоят ахборот-кутубхона маркази томонидан шахсий таркиб ўртасида китобхонлик маданиятини ошириш борасида «Мен китоб ўқишни севаман» шиори остида акция ва кўрик-танлов ўтказилиши белгиланди.
Шунингдек, тадбир доирасида «Фарғона китоб олами» маърифий мажмуаси томонидан китоб ярмаркаси ташкил этилди.
Изоҳ (0)