Азиз Абдуҳакимов: Малайзия ва индонезияликлар Ҳаждан олдин Ўзбекистонга келиши учун тўғридан-тўғри авиарейс ташкил этилади

15 январь куни Миллий матбуот марказида ўтказилган матбуот анжуманида Туризмни ривожлантириш давлат қўмитаси раиси Азиз Абдуҳакимов Ўзбекистонда зиёрат туризми бўйича амалга оширилаётган ишлар ҳақида сўзлаб берди.

Малайзияда ҳозирда ҳажга бориш навбатини 42 йил кутишга тўғри келади. Ўрта ҳисобда ойига 100 мингга яқин Индонезия фуқароси Туркия орқали Умрага қатнамоқда. Бизнинг зиёратгоҳларимиз кўп, у давлатлар учун муқаддас бўлган Ал-Бухорий, Ал-Мотуридий зиёратгоҳлари бор.

Малайзия ва индонезияликлар Маккага Ҳаж қилишидан олдин қисқа муддат — керак бўлса бир ҳафта Ўзбекистонда қолиб, зиёратгоҳларимизга ташриф буюриши ва Ўзбекистонда вақт ўтказиши бўйича Президентимиз томонидан топшириқлар берилди.

Бунинг учун кўп қамровли ишлар олиб борилиши керак. Ташриф буюрадиган меҳмонлар учун шароитлар яратилиши лозим. Бунинг учун бизнинг қўмитамиз томонидан тегишли стандартлар ишлаб чиқилиб, 2018 йилдан бошлаб меҳмонхоналарнинг 10 фоиз хонасида Қуръони карим китоби бўлиши, 30 фоиз хонасида қиблани кўрсатувчи белгилар қўйилиши керак.

Бундан ташқари, улар учун кўплаб турлар ташкил қилиниши лозим. Бу борада бизнинг туристик операторларимиз Малайзия ва Индонезия компаниялари билан ҳамкорлик ўрнатмоқда. Февраль—март ойларидан бошлаб тўғридан-тўғри Жакарта—Самарқанд—Жидда авиарейсини йўлга қўймоқчимиз. Бу юқорида айтилган режаларимизни амалга оширишга имконият яратади.

Зиёрат туризми ҳақида гапирганда фақатгина ислом давлатларидан келувчи сайёҳлар ҳақида ўйлашимиз керак эмас. Исроилликлар Жануби-Шарқий Осиё мамлакатларига саёҳат қилаётганида Ўзбекистон аэропортларидан транзит сифатида фойдаланмоқда. Ҳозирги кунда икки мингга яқин сайёҳ транзит қилиб Ўзбекистондан ўтмоқда, лекин улардан бирортаси бу ерда вақтини ўтказмайди. Бу оқимни 10 мингтага ошириш учун исроилликларга қисқа муддатли визалар бериб, транзит вақтида улар Ўзбекистонда камида 3 кун қолиши учун ишлар олиб борилмоқда.

Сурхондарё вилоятида буддизмга алоқадор кўплаб обидаларимиз бор. Ҳозирги кунда Япония, Корея, Хитой давлатларидан катта қизиқиш билдиришмоқда ва бир неча лойиҳаларни амалга ошириш кўзда тутилмоқда.

Азиз Абдуҳакимов, Туризмни ривожлантириш давлат қўмитаси раиси