12 ёшли Гитанжали Рао 2017 йилда АҚШнинг энг яхши ёш олими эътирофига сазовор бўлди, деб хабар беради Forum Daily.
Қизчага мазкур эътироф сув таркибида қўрғошин борлигини аниқлашнинг тез ва арзон усулини ихтиро қилгани учун берилди.
Қизча илмий фаолият билан боғча пайтидан бошлаб шуғулланади. Унинг ҳисобида саккизта ихтиро мавжуд. Бироқ Гитанжали яратган 10 сонияда сув таркибидаги қўрғошин даражасини аниқлаб берувчи 3D-принтерда чоп қилинган ускуна унга шуҳрат олиб келди.
Қизча яратган Tethys ускунасида углеродли нано-найчалардан иборат фильтр мавжуд бўлиб, у сувдаги қўрғошин миқдорини аниқлайди. Ускуна Bluetooth-узатгич билан таъминланган бўлиб, у текширув натижасини смартфон экранига узатади.
Гитанжали ўз ихтироси билан Мичигандаги Флинт шаҳри аҳолисига ёрдам беришга қарор қилди. 2016 йилда шаҳар аҳолиси қўрғошинли сувдан тарқалган инфекциядан азият чеккан эди.
«Ҳаммаси сув таркибидан қўрғошинни чиқариб ташлаш усулини излашдан бошланди. Кейинроқ мен жуда катта қадам ташлашга уринаётганимни, мен аввал сув таркибидан қўрғошинни йўқотиш усулини эмас, балки унинг сув таркибида мавжудлигини аниқлаш усулини топишим кераклигини тушундим», — дейди Рао.
Ускунани яратиш ғояси қизчада ота-онаси сувни аксарият ҳолларда маълумотни хато кўрсатадиган тест чизиқчалар ёрдамида текшираётганини кўрганидан кейин туғилди.
Гитанжалига ихтироси учун 25 минг доллар миқдорида мукофот пули берилди.
Қизча яратган ускунанинг нархи ҳозирда 20 долларни ташкил этади. Кейинчалик уни улгуржи ишлаб чиқариш бошланса, нарх яна ҳам арзонлашиши мумкин.
Гитанжали сотувдан тушган пулни сув таркибида қўрғошин борлигини аниқловчи ускунани ишлаб чиқариш бўйича бизнесга тикишни ният қилмоқда. Келажакда у эпидемиолог ёки генетик бўлишни орзу қилади.
Гитанжали бошқа болаларга ҳеч қачон таслим бўлмасликни маслаҳат беради.
«Фаолиятимни энди бошлаган пайтимда кўп бора омадсизликка учраганман. Шундан сўнг хатоларимни тўғрилашга ҳаракат қилдим ва омадсизлик муваффақият сари яна бир қадам эканлигини тушундим», — дейди Гитанжали.
Изоҳ (0)