10 январдан бошлаб Jizzakh Petroleum АЁҚШлари импорт бензин сота бошлайди

10 январь куни Тошкентда Jizzakh Petroleum қўшма корхонасининг тўртта ёнилғи қуйиш шохобчалари ишга тушади, деб хабар берди «Газета.uz».

Аввалига шохобчалар Аи-95 (бир литри 8500 сўм) ва Аи-98 (9000 сўм) маркасидаги импорт бензинларини, шунингдек, дизель ёнилғисини (8500 сўмдан) сота бошлайди.

Бензин етказиб бериш ойда бир марта амалга оширилади. Шохобчанинг резервуарларига қуйиладиган кунлик ёнилғи ҳажми маълум қилинмади, бироқ ташкилот вакилларининг таъкидлашича, станциялар кунига 24 соат ишлайди.

Jizzakh Petroleum’нинг дастлабки тўртта шохобчаси Боғишамол, Аҳмад Дониш, Олмазор туманидаги Кичик ҳалқа йўли ва Қушбеги массивида жойлашган.

Аввалроқ, Жиззах вилоятида қиймати 2,2 миллиард долларга тенг замонавий нефтни қайта ишлаш мажмуаси барпо этилиши ҳақида хабар берилганди.