Ўзбекистон Туризмни ривожлантириш давлат қўмитаси ташаббуси билан ишлаб чиқилган ва тасдиқланиши кутилаётган ҳужжат лойиҳасига кўра, умумий овқатланиш пунктлари, меҳмонхоналар, сувенир дўконлари, йўл бўйи инфратузилмаси сервис зоналари, боғлар, бозорлар, автомобилга ёқилғи қуйиш шохобчалари, автомобиллар учун вақтинчалик тураргоҳлар, хизмат кўрсатиш соҳаси ва одамлар кўп йиғиладиган бошқа жойларда ҳожатхоналар инвентаризациядан ўтказилади, деб ёзади «Nuz.uz».
Инвентаризация якунларига кўра, ҳожатхоналар бўлмаган жойларда улар қурилади, мавжуд ҳожатхоналар эса жорий ҳолатига қараб, учта гуруҳга бўлинади ва икки йил ичида чет мамлакатларда қабул қилинган талабларга жавоб берадиган ҳолатга келтириш бўйича йўл хариталари ишлаб чиқилади.
Туризм қўмитаси тадбиркорлик субъектларига солиқ имтиёзларини тақдим этиш ва шунинг ҳисобига ўз ҳожатхоналарини зарур ҳолатга келтириш ва уларни тоза ва тартибли ҳолатда сақлаши учун имкони беришни таклиф қилмоқда.
Яхши таъмирланган ва сантехникаси соз бўлган ҳожатхоналарда санузелни тозалашнинг тизимлаштирилган графигини жорий қилиш таклиф этилмоқда. Бунда масъул ходим мунтазам равишда белгиланган вақтда ҳожатхонани тозалайди. Иккинчи тоифали (конструкцияси яхши бўлган, сув ва каналиацияга уланган) ҳожатхоналар капитал таъмирдан чиқарилиши ва сантехникаси алмаштирилиши ҳамда биринчи ҳолатдаги каби хизмат кўрсатиш даражаси жорий қилиниши керак.
Олис ҳудудларда жойлашган, қўлбола материаллардан қурилган, сув ва канализацияга уланмаган учинчи тоифадаги ҳожатхоналар реконструкция қилинади ва бир неча тонналик сиғимга эга баклар билан таъминланади ҳамда ассенизация хизмати кўрсатиладиган бетон ахлат ўралари қурилади.
Изоҳ (0)