«Қишлоқ қурилиш банк» Ягона умумреспублика процессинг маркази билан ҳамкорликда UnionPay International халқаро тўлов тизими пластик карталарини UzCard тўлов тизими терминалларида қабул қилиш лойиҳасини якунлади. Ўзбекистонда илк бор жорий этилаётган бу амалиётни бажариш учун банк терминалларига махсус дастурни юклаб олишнинг ўзи кифоя, деб хабар беради банк матбуот хизмати.
Эндиликда савдо ва хизмат кўрсатиш шаҳобчаларига ўрнатилган «Қишлоқ қурилиш банк» терминалларида бир вақтнинг ўзида UzCard ва UnionPay халқаро тўлов тизими карталарини қабул қилиш имконияти пайдо бўлди.
Бугунги кунда сайёҳлар кўп ташриф буюрадиган ҳудудлар, жумладан, Самарқанд, Бухоро ва Хива шаҳарларидаги савдо ва хизмат кўрсатиш шаҳобчаларида жойлаштирилган терминалларни ушбу хизматга улаш ишлари бошлаб юборилди.
Хизматнинг жорий этилиши хорижлик меҳмонларга қўшимча қулайликлар яратади. UnionPay халқаро тўлов тизими пластик карталарига эга хорижлик сайёҳ UzCard терминаллари орқали Ўзбекистонда ўз юртидаги каби эркин ва ҳеч қандай чекловларсиз тўловларни амалга ошириши мумкин.
Изоҳ (0)