Британиянинг Chapman Taylor архитектура компанияси Тошкентда премиум-классга мансуб турар жой — Mirabad Avenue лойиҳасини амалга оширмоқда. ArchiKultura’нинг ёзишича, бу Ўзбекистоннинг элита турар жойлар қуриш тарихидаги энг катта иншоотдир — у 5, 9 ва 12 қаватли жами 16 бинодан иборат бўлади.
Янги мажмуа Тошкентнинг Миробод кўчаси бўйлаб қад ростлайди. Маълумот учун, бу кўчадаги «Дилкаш» кафеси ва унга ёндош бошқа умумий овқатланиш ва савдо нуқталари 2017 йил мартида бузила бошлаган эди. Уларнинг ўрнини кўп қаватли замонавий турар жой мажмуаси эгаллаши ўшандаёқ маълум бўлган эди.
Мавзуга доир: Фото: Мирободдаги «Дилкаш» энди йўқ. У ва унга ёндош бошқа емакхоналар ўрнида кўп қаватли уйлар қурилади
Мажмуада 834 та квартира бўлиши кўзда тутилган, бу хонадонлар Ғарбда оммабоп ҳисобланган «ақлли уй» инновацион тизими билан тўлиқ таъминланади. Тизим энергия ресурсларининг самарали истеъмолини, уйнинг юқори даражадаги муҳофазаси ҳамда техник хавфсизлигини таъминлайди.
Mirabad Avenue ҳудудида элит дўконлар, ресторанлар ва кафелар очилиши режалаштирилган. «Шахсий ҳаёт ишончли ҳимоя остида бўлади: ёпиқ ҳовли, релакс ҳудудлар, болалар учун майдончалар», — деб ёзади ArchiKultura.
Chapman Taylor ушбу лойиҳани Ўзбекистоннинг Golden House компанияси билан ҳамкорликда амалга оширмоқда. Компания маълумотларига кўра, мажмуа фойдаланишга топширилиши билан (2020 йил биринчи чорагида), Миробод кўчаси ҳақиқий шопинг-авенюга айланади.
Изоҳ (0)