Панама ҳукумати ўзининг Исроилдаги элчихонасини Тел-Авивдан Қуддусга кўчирмоқчи эмас. Бу ҳақда Панама Ташқи ишлар вазирлиги маълум қилди, дея хабар бермоқда «РИА Новости».
«Панама Ташқи ишлар вазирлиги Исроил давлатидаги ўз элчихонасини Тел-Авив шаҳрида қолдиришини тасдиқлайди», — дейилади идоранинг Twitter’даги саҳифасида қолдирилган хабарда.
Аввалроқ матбуотда Панама ҳукумати, Гватемаладан сўнг, ўзининг Исроилдаги элчихонасини Тел-Авивдан Қуддусга кўчириш масаласини ўрганиб чиқаётгани ҳақида хабарлар пайдо бўлган эди.
24 декабрь куни Гватемала президенти Жимми Моралес мамлакатнинг Исроилдаги элчихонаси Тел-Авивдан Қуддусга кўчирилишини эълон қилган эди. Бунгача АҚШ президенти Дональд Трамп Қуддусни Исроил пойтахти сифатида тан олиб, ўз мамлакатининг бош дипломатик ваколатхонасини шу шаҳарга кўчириш ҳақида кўрсатма берган эди.