23 декабрь куни Ўзбекистон Молия вазирлигида оммавий ишдан бўшатишлар бўлиб ўтгани муқаддам хабар қилинган эди. Бир неча кундан сўнг Молия вазирлиги бир кунда 50 нафар ходимнинг ишдан бўшатилганини инкор этди ҳамда учта бошқарма бошлиқлари ўз лавозимидан озод этилганини эълон қилди.
Бугун, 26 декабрь куни ЎзА вазирликдан неча киши бўшатилганига аниқлик киритди.
Айтилишича, Шавкат Мирзиёевнинг 22 декабрдаги Олий Мажлисга мурожаатномасида Молия вазирлиги тизимидаги жиддий камчиликлар танқидидан кейин ўша куни вазирлик марказий аппаратидан 2 нафар бош бошқарма бошлиғи, 2 нафар бош бошқарма ўринбосари, 4 нафар бошқарма бошлиғи, 1 нафар бошқарма бошлиғи ўринбосари, 3 нафар бўлим бошлиғи ҳамда 4 нафар ходим, жами 16 киши эгаллаб турган лавозимидан озод этилди. Бугунги кунга келиб буларнинг сафига 8 киши қўшилган ва бу рақам 24 тани ташкил этади.
Жумладан, ғазначилик бошлиғи ўринбосари — амалиёт бошқармаси бошлиғи Ф. Нурмуҳамедов, бухгалтерия ҳисоби ва аудит услубиёти бошқармаси бошлиғи Ш. Ҳайдаров, саноатнинг базавий тармоқлари ва ёқилғи-энергетика мажмуи молияси бошқармаси бошлиғи вазифасини бажарувчи А. Абдуллаев, давлат молиявий назорати бош бошқармаси бошлиғининг ўринбосари М. Агзамов, солиқ ва божхона тарифи сиёсати бошқармасининг бошлиғи I. Голишева, давлат молиявий назорати бош бошқармаси ташкилий-услубий ишлар бўлими бошлиғи Б.Жумаевлар эгаллаб турган лавозимларидан озод этилди.
Шунингдек, агентлик яқин вақт ичида Президент танқид қилган, ижтимоий тармоқларда кўплаб шов-шувларга сабаб бўлаётган Острогожская хоним ҳақидаги чин маълумотлар билан таништиришни ваъда берди.
Изоҳ (0)