Олий Мажлис Сенати ва Қонунчилик палатасида Қирғизистон Жогорку Кенеши спикери Достонбек Жумабеков бошчилигидаги парламент делегацияси билан учрашувлар бўлиб ўтди. Бу ҳақда ЎзА хабар бермоқда.
Олий Мажлис Сенати Раиси Ниғматилла Йўлдошев билан учрашувда Ўзбекистон — Қирғизистон ҳамкорлиги турли йўналишларда жадал тараққий этаётгани, парламентлараро алоқаларнинг мустаҳкамланиши ўзаро муносабатларнинг янада кенгайишига хизмат қилиши таъкидланди.
Олий Мажлис Қонунчилик палатаси Спикери Нурдинжон Исмоилов билан суҳбатда қонун чиқарувчи органлар ўртасидаги алоқалар жадал суръатларда ривожланиб бораётгани, келгусида икки мамлакат муносабатларини савдо-иқтисодий, ижтимоий-сиёсий соҳаларда мустаҳкамлашга йўналтирилган норматив-ҳуқуқий ҳужжатлар қабул қилиниши қайд этилди.
Қирғизистон делегациясининг ташрифи доирасида Олий Мажлис ва Қирғизистон Жогорку Кенеши ўртасида икки томонлама парламентлараро ҳамкорликни ривожлантириш бўйича «Амалий тадбирлар режаси» («Йўл харитаси») имзоланди.
Парламент делегацияси Мустақиллик майдонига ташриф буюриб, Мустақиллик ва эзгулик монументи пойига гул қўйди. Ўзбекистон Миллий университетида ташкил этилган «Чингиз Айтматов ва Ўзбекистон» мавзуидаги кўргазма ҳамда Ҳазрати Имом мажмуасидаги тарихий-маърифий ёдгорликлар билан танишди.
Изоҳ (0)