Россия Тожикистонга 100 миллион долларлик танк ва вертолётларни бепул тақдим этди

Россия Тожикистонга 122 миллион долларлик ҳарбий техникани бепул тақдим этди, деб хабар қилади «ТАСС».

«Топширилган қурол-яроғ ва ҳарбий техника Тожикистон қуролли кучларининг террорчилик ҳужумларини бартараф этишдаги имкониятларини кенгайтиришга ва тожик—афғон чегарасида мустаҳкам тўсиқ яратишга ёрдам беради», — деди Мудофаа вазирлигининг халқаро ҳарбий ҳамкорлик бўйича бош бошқармаси раҳбари Александр Кшимовский.

Тожик ҳарбийлари учта «Т-72Б1» танкини, тўққизта «БТР-80», «БТР-70» ва «БМП-2» машинасини, учта «Д-30» гаубицасини ва учта «23M1» зенит қурилмасини қабул қилиб олди. Шунингдек, мамлакатга «Ми-23» ва «Ми-8» вертолётлари, тиббиёт ва топографик анжомлар, зирҳли техникага эҳтиёт қисмлар, алоқа востиалари ва бошқа майда қуроллар топширилди.

Россия Федерацияси Президенти ҳузуридаги Россия халқ хўжалиги ва давлат бошқаруви академиясининг маълумотларига кўра, Собиқ иттифоққа аъзо давлатлар орасида 2011 йилдан буён Қирғизистон, Арманистон ва Тожикистон салмоқли ёрдам олган.

Қирғизистон 2015 йилда Россия—Қирғизистон тараққиёт жамғармасига ажратилган маблағлар билан бирга 322,8 миллион доллар, 2011—2015 йиллар давомида эса 653 миллион доллар олган. Арманистонда эса ушбу кўрсаткич 2015 йилда  — 37,4 миллион долларга, 2011-2015 йилларда — 57,3 миллион долларга тенг. Тожикистон учун ушбу маблағлар тегишли равишда 21,8 миллион долларни ва 79,5 миллион долларни ташкил этади.