Исроилда оммавий норозилик намойишлари бўлиб ўтмоқда. Намойишчилар ва ҳуқуқ-тартибот ходимлари ўртасидаги тўқнашувлар Ғазо секторида, Хевронда, Шхемда ва Фаластиннинг бошқа автоном вилоятларида , шунингдек, Қуддуснинг Эски шаҳрида содир бўлди. Тўқнашувлар оқибатида 100 дан ортиқ одам жароҳат олган. Бу ҳақда «Newsru»га таяниб, Forum Daily хабар берди.
Бир неча юзлаб ёшлар Қуддуснинг Шхем дарвозалари атрофига тўпланиб, Исроил ҳарбий хизматчилари ва полициячиларига қарата тош ва сув солинган идишларни ота бошлаган. Полиция матбуот хизматининг хабар беришича, норозилик намойишида қатнашган уч киши қўлга олинган.
Тўқнашувлар Шуафатда ҳам содир бўлган. Хавфсизлик кучлари намойишчиларни тарқатиб юбориш учун махсус воситалардан фойдаланишга мажбур бўлган. Фаластинлик манбаларнинг маълум қилишича, тўқнашув оқибатида 5 ёшли болакайнинг бошига резина ўқ теккан.
Ҳуқуқ-тартибот ходимлари Хеврондаги намойишчиларни ҳам тарқатиб юбориш учун резина ўқлар, шок-гранаталар ва кўзни ёшлантирувчи газлардан фойдаланган.
Эслатиб ўтамиз, аввалроқ Исроил мудофаа вазири Авигдор Либерман АҚШ президенти Дональд Трампнинг «Оқ уй Қуддусни яҳудийлар давлатининг пойтахти эканлигини тан олади», дея билдирган сўзларини манмуният билан қабул қилган эди.
Шундан сўнг, Фаластинда норозилик намойишлари бошланиб кетди. 7 декабрь, пайшанба куни янги интифада — Фаластин ҳаракати — «ХАМAC» сиёсий бюроси раҳбари Исмоил Хония чиқиш қилиб, «эртанги кун ғазаб ва халқимизнинг босқинчиликка қарши бош кўтарган куни бўлади, биз ғалаба қозонишимизга ва муқаддас ерларимизни қайтариб олишимизга ишонамиз», — дея мурожаат йўллади.
Изоҳ (0)